98 меңнән артык, яки 50% ка якын казанлы, МАХ мессенджерында гомумйорт чатларына тоташкан

Чатка тоташу өчен подъездда идарәче компания тарафыннан урнаштырылган QR-кодны сканерларга яки Дәүләт хезмәтләре.Йорт кушымтасын урнаштырырга кирәк

Денис Гордийко фотосы

Казанда яшәүче 98 меңнән артык кеше безнең илдә уйлап табылган MAX мессенджерының рәсми гомумйорт чатларында теркәлгән. Хәзерге вакытта аудиторияне колачлау күрсәткече максат итеп куелган күрсәткечнең (планнарда – 216 760 кулланучыны җәлеп итү) 45,3 процентын тәшкил итә. Татарстан Республикасы Дәүләт торак инспекциясе төбәк башкаласында расланган 5419 бергәлек – 16 һәм аннан да күбрәк фатирлы һәр күпфатирлы йорт өчен берешәрне булдырган. Зур булмаган йортларда яшәүчеләр чатны мөстәкыйль рәвештә булдыра ала.

MAX ның популяр чит ил мессенджерларыннан төп аермасы – Торак-коммуналь хуҗалыгының дәүләт мәгълүмат системасындагы мәгълүматлар һәм идарәче компанияләрнең реестрлары белән тулы тәңгәллек. Чатларга керү бары тик «Дәүләт хезмәтләре» порталында расланган хисап язмасы аша гына башкарыла. Болай эшләү дискуссияләрдә бары тик торак милекчеләре генә катнашуын тәэмин итә, һәм мошенниклар, реклама ботлары яки чит затлар булуны тулысынча кире кага.

Фикер алышуларда тәртипне модераторлар булып торучы торак милекчеләре ширкәте яки идарәче компанияләр вәкилләре хуплый. Бу коммуналь мәсьәләләрне нәтиҗәле хәл итәргә мөмкинлек бирә.

Мессенджерның мөмкинлекләре техник төзексезлекләр (су агу, лифтлар ватылу, чүп тыгылу) турында гаризалар бирү, подъездларны һәм йорт яны территорияләрен җыештыру сыйфатын контрольдә тоту кебек көндәлек бурычларны оператив хәл итәргә мөмкинлек бирә. Шулай ук төркемнәр аша суны сүндерү яки капиталь төзекләндерү графигы турында оператив хәбәрнамәләр алырга, квитанцияләрдәге исәпләүләрне аңлатырга һәм исәпләү приборлары күрсәткечләрен тапшырырга мөмкин. Чатта ресурслар белән тәэмин итүче оешмалар да булганлыктан, халык үзенә кагылышлы четерекле мәсьәләләрне идарәче компанияләрсез дә хәл итә ала.

Яңа мөмкинлекләр дә кертелә: MAX интерфейсындагы мини-кушымталар ярдәмендә башкала халкы счетчик күрсәткечләрен тапшыра һәм счетларны тиз түләүләр системасы аша түли ала. Әлеге алымнар шәһәр халкын идарәче компанияләр офисына шәхсән йөрүдән коткара. Чатка тиз арада тоташу өчен подъездларда идарәче оешмалар тарафыннан урнаштырылган QR-кодларны сканерлау да җитә.

Үзара хезмәттәшлек тарихының сакланып калуы мессенджерның мөһим үзенчәлеге булып тора. Барлык бергәлекләрнең рәсми хуҗасы Дәүләт торак инспекциясе булганлыктан, идарәче компания алышынган очракта язышу һәм гаризалар тарихы тулысынча саклана. Әлеге мөмкинлек башкарылган эшләр яки яшәүчеләрнең агымдагы мөрәҗәгатьләре турында мәгълүматны югалтудан саклап кала.

Үз йортыңның рәсми чатына шулай ук Дәүләт хезмәтләре.Йорт/Госуслуги.Дом мобиль кушымтасы аша кушылырга була: әгәр милек хокукы расланса, система кулланучыга автомат рәвештә расланган төркемгә керергә тәкъдим итәчәк.

«Госуслуги Дом» кушымтасы аша үз йортыңның рәсми чатына керү өчен MAX кушымтасын йөкләтергә һәм телефон номеры буенча теркәлергә, Дәүләт хезмәтләренең расланган хисап язмасы аша «Госуслуги.Дом» га керергә, төп биттә «Домовой Чат» пунктын сайларга, «Перейти в Чат» төймәсенә басарга, аннары «Кушылырга/Присоединиться» кирәк.

Казанда күпфатирлы йортлар белән 137 идарәче компания идарә итә, алар идарәсендә күпфатирлы 5086 йорт (84,2% йорт) санала, 740 торак милекчеләр ширкәте һәм торак-төзелеш кооперативы исә күпфатирлы 842 йорт (14,3% йорт) белән идарә итә. Күпфатирлы 86 йорт (йортларның 1,5% ы) белән милекчеләр турыдан-туры үзләре идарә итә.

Шулай ук укыгыз

Барлык яңалыклар