Илсур Метшин: «Цифрлы җайланмалар ярдәм итә. Без юлның һәр участогына яки чүп контейнерына инспектор куя алмыйбыз»

ККК җыю мәйданчыкларында автомат рәвештә теркәү системасы төзекләндерү кагыйдәләрен бозучы 41 кешене ачыклады

Казанда каты коммуналь калдыкларны җыю мәйданчыкларында төзекләндерү кагыйдәләрен бозуларны автомат рәвештә теркәү системасы 41 транспорт чарасы хуҗасын административ җаваплылыкка тартырга мөмкинлек бирде. Бүгенге көнгә салынган 82 мең сум штрафның 46 меңе түләтелгән. Бу хакта эшлекле дүшәмбедә административ комиссияләр эшчәнлеген оештыру идарәсе башлыгы Наил Биктаһиров хәбәр итте.

Ел башыннан төзекләндерү кагыйдәләрен бозуларны автомат рәвештә теркәү системасы сынау режимында ККК җыюның ике мәйданчыгында эшли. Хокук бозуларны катгый күзәтү «ПЖКХ» ИК төбәк операторы үтенече буенча оештырылды. Ярдәмгә ясалма интеллект базасындагы программа-аппарат комплексы килде.

Система контейнерлардан тыш чүп-чар ташлауга юл куя торган транспорт чараларын таный һәм автомат рәвештә бу хокук бозуларны терки. «Безне цифрлы җайланмалар коткара, чөнки без юлның һәр участогына яки чүп контейнерына инспектор куя алмыйбыз. Ә камералар даими кешегә күзәтү авыр булган вакытларны ачыклый», — дип белдерде Казан мэры Илсур Метшин. Ул шулай ук массакүләм мәгълүмат чараларына тәртип бозучыларның номерлары һәм йөзләре белән материалларны активрак күрсәтүне сорап мөрәҗәгать итте: «Кешеләрнең шәһәрне һәм чисталыкны ничек яратуларын күрсәтергә кирәк».

Наил Биктаһиров, үз чиратында, системаның нәтиҗәлелеген анализлау максатыннан, аны эшләүче тарафыннан бушлай бирелүен хәбәр итте. Бүгенге көндә проектны киңәйтергә кирәк.

«Чүп савыты мәйданчыклары буенча кирәкле кертемнәр күләмен якындагы уртак киңәшмәгә әзерләгез», – дип мөрәҗәгать итте Башкарма комитет җитәкчесенә Илсур Метшин.

«ПЖКХ» идарәче компаниясенең төбәк операторы мәгълүматлары буенча шәһәрдә 67 проблемалы чүп контейнеры мәйданчыгы исәпләнә. Хокук бозуларны автомат рәвештә теркәү җайланмаларын сатып алуга чыгымнар 53,6 млн сум тәшкил итәчәк.