Яңа Савин районында 21 мең кв. метр мәйданлы ишегалды төзекләндерелде

Фәнис Нурмөхәммәтов халык белән бергә балалар һәм спорт мәйданчыклары белән яңартылган ишегалдын бәяләде

Фото: Денис Гордийко

(Казан шәһәре KZN.RU, 21 нче июль, Диана Жиленкова). Казанда Фатыйх Әмирхан урамы, 28, 30, 32 адреслары буенча урнашкан ишегалды территориясен төзекләндерү тәмамланды. Машиналар йөри торган юл өлешендә яңа асфальт-бетон япма җәелде, балалар һәм спорт мәйданчыклары урнаштырылды. Эш нәтиҗәләрен Авиатөзелеш һәм Яңа Савин районнары администрациясе башлыгы Фәнис Нурмөхәммәтов бәяләп кайтты.

20,6 мең кв.м мәйданлы ишегалды территориясен төзекләндерү апрель аенда башланды. Берничә ай дәвамында биредә сигез эшче һәм дүрттән сигез берәмлеккә кадәр техника эшләгән.

Тирә-якта берничә тугыз катлы йорт урнашкан, анда барлыгы 443 фатирда 1150 кеше яши. Традиция буенча, эш башланыр алдыннан җирле халык белән очрашулар узды, алар үз теләкләрен белдерделәр.

«Аңлашыла, төрле фикерләр бар. Машина йөртүчеләр күбрәк машина кую урыннары телиләр. Әниләр уен мәйданын киңәйтү яклы. Олы яшьтәгеләрнең агач астындагы күләгәдә тыныч кына эскәмияләрдә утырасы килә. Мондый бәхәсләрдә хакыйкать туа. Без һәрвакыт алтын урталыкны табабыз һәм кешеләрнең теләкләрен исәпкә алабыз», – дип билгеләп үтте Фәнис Нурмөхәммәтов.

Мәсәлән, җирле халык үтенече буенча спорт мәйданчыгы төзегәннәр һәм алар йөрергә күнеккән юлларны саклап калганнар. 22 эскәмия, 24 урна урнаштырылган. Ә парковка урыннары саны 23 кә арткан һәм 73 кә җиткән.

Үз тәэсирләрен оныклары белән бергә ишегалдында ял иткән Римма Барейчева да җиткерде. «Миңа барысы да чиста, пөхтә, матур булуы, тигез юл барлыкка килүе ошый. Элек монда шулкадәр төзекләндерелмәгән иде, безгә кибеткә барганда ишегалдын урап үтәргә туры килде, барырга мөмкин түгел иде. Юлның җимерек булуы, машиналарның ничек торганы аңлашылмады. Хәзер аларның машина куярга урыны бар, һәм бу бик яхшы».

Авиатөзелеш һәм Яңа Савин районнары администрациясе башлыгы билгеләп үткәнчә, еш кына яшәүчеләр үз инициативалары буенча территорияне яшелләндерүдә дә ярдәм итәләр. «Көзге-язгы чорда халык үзләре җыела да кайда һәм нинди куак-агачлар утыртырга икәнен хәл итә. Бездә, мәсәлән, Меридиан урамы бар, Мусин 62-68, анда яшәүчеләр утырталар, кисәләр, тәрбиялиләр. Бу аларның ишегалды, байлыгы. Халык белән бергә эшләгәндә ишегаллары уңайлы һәм матур була».

Аның сүзләренчә, өч ел эчендә 572 мең кв.м асфальт-бетон япма салынган, 1,5 меңнән артык яктылык ноктасы һәм 5,2 мең кече архитектура формалары урнаштырылган.

«Быел «Безнең ишегалды» программасына Авиатөзелеш һәм Яңа Савин районнарының 49 ишегалды эләкте, шуларның 15 е инде үтәлде. Киләсе атнада эш тагын биш ишегалдында тәмамланачак. График буенча барабыз, артта калулар юк», – дип йомгаклады Фәнис Нурмөхәммәтов.

Исегезгә төшерәбез, быел Казанда 533 мең кв.метрдан артык асфальт-бетон өслеге булган 482 йортның территориясен яңартачаклар. Яхшырту ТР башкаласында яшәүче 100 мең кешегә кагылачак.

Өч ел эчендә программа буенча 1,3 меңнән артык күпфатирлы йортның территорияләре яңартылган, аларның гомуми мәйданы 2 млн кв.м. Шуларның 466 йортында эшләр башкарылган. 2,9 мең терәкле светодиодлы яктырткычлар һәм 2 мең кечкенә архитектура формалары урнаштырылган, 5 мең яңа парковка урыны барлыкка килгән.