Назарбаев урамындагы күперне капиталь ремонтлау 84% ка тәмамланган – хәрәкәт октябрьдә ачылачак

Объектта эшләр тәүлек әйләнәсе алып барыла

Фото: Марат Мөгыйнов

(Казан шәһәре KZN.RU, 15 нче сентябрь). Назарбаев урамындагы күперне капиталь ремонтлау 84% ка тәмамланган. Объектта 12 берәмлек махсус техника һәм 22 юл эшчесе җәлеп ителгән, эшләр тәүлек әйләнәсе алып барыла. Аларны 15 нче октябрьгә кадәр тәмамларга планлаштыралар.

Бүгенге көндә тышкы яктырту җайланмасы, күпер конуслары, откослар һәм автомат су сибү, барьер һәм җәяүлеләр өчен койма урнаштыру башкарыла. 6 435 кв.м мәйданда асфальт җәелгән. Гомуми мәйданы 2 564 кв.м булган тротуар ясалган, 463 борт ташы урнаштырылган.

Эшләр тәмамлангач, полосалар саны алтыдан сигезгә кадәр арттырылачак, ә күчәрнең күтәрү йөкләнеше 15 тоннадан 25 тоннага кадәр артачак. Җәяүлеләр зоналары киңәйтеләчәк һәм Түбән Кабан күле ягыннан велосипед юлы барлыкка киләчәк.

Исегезгә төшерәбез, объектны 2019 елда тикшерделәр: ул вакытта белгечләр күпернең авария хәлендә булуын билгеләделәр. Шуннан соң авыр техника хәрәкәтенә чикләү кертелә. Узган ел эшчеләр җәяүлеләр өлешен сүтә һәм электр белән тәэмин итү челтәрләрен үзгәртеп корырга керешә. Эшләр үткәргәндә күпер конструкциясенең куркыныч деформациясе күзәтелә. Сентябрь ахырында объект тулысынча хәрәкәт өчен ябылды.

Машина йөртүчеләргә һәм пассажирларга уңайлы булсын өчен Казан буенча ЮХИДИ белән берлектә транспорт комитеты әйләнеп узу юллары схемасын, шул исәптән җәмәгать транспорты өчен дә, эшләде һәм килештерде. Түбән Кабан яр буендагы күпер һәм Һади Такташ урамын тоташтыручы тротуар оештырылды. Аның ярдәмендә шәһәр халкы участокны әйләнмичә турыдан уза.

Башта эшләрне 2024 елда тәмамларга планлаштыралар, әмма эшләрне тәмамлау вакытын бу елга күчерергә мөмкин була. Июль аенда төзелеш мәйданчыгында Мэр Илсур Метшин булды һәм эшләрнең барышын бәяләде.