Илсур Метшин «Безнең ишегалды» программасы турында: «Быел төзекләндерү эшләре Казанның 408 ишегалдына кагылачак, алар дистәләрчә еллар дәвамында ремонт күрмәгән»

Ишегалды территорияләрен төзекләндерүгә 2,3 млрд сум юнәлдереләчәк.

Фото: Денис Гордийко

(Казан шәһәре KZN.RU, 12-нче апрель, Камилә Гобәйдуллина). Казанда «Безнең ишегалды» президент программасын гамәлгә ашыруга быел 2,3 млрд сум бүлеп бирелгән. «Быел яхшырулар 408 ишегалды территориясенә кагылачак, алар ремонтны дистә еллар дәвамында күрмәгән. Әгәр дә элек без асфальтны гына ремонтлый ала алсак, хәзер исә тулы спектрлы эш башкарабыз: асфальт ремонтын да, парковка өчен кесәләрне арттыруны да, яктыртуны да, балалар мәйданчыкларын да – мохитнең сыйфатын башка дәрәҗәгә чыгара торган бөтен нәрсәне дә, – диде эшлекле дүшәмбедә Татарстан башкаласы Мэры Илсур Метшин.

Узган ел Казан ишегалларын тиешле хәлгә китерүгә 2 млрд 700 млн сум юнәлдерелгән. «Безнең ишегалды» программасы буенча 2020 елда 460 күп фатирлы йорт ишегалларын төзекләндерделәр, алар 700 мең кв.м мәйданлы яңа асфальт өслек, 2,2 мең энергоэффектив яктырткычлар, 2,5 меңгә якын кече архитектура формалары, балалар һәм спорт җиһазлары алдылар, дип сөйләде Башкарма комитет җитәкчесе урынбасары – Тышкы төзекләндерү комитеты рәисе Игорь Куляжев.

2021 елда 2 млрд сум ишегалларында асфальт-бетон эшләргә юнәлдереләчәк. Барлыгы 520 мең кв. м. асфальт өслекне тәртипкә китерү планлаштырыла. Тагын 165 млн сум акча урамнарны яктыртуга һәм кече архитектура формаларына бүленгән.

И.Куляжев сүзләренә караганда, уңайлы һава шартлары барлыкка килгән очракта, эшкә керешү планлаштырыла. Моның өчен беренче чираттагы объектлар исемлеге әзерләнгән. Эшләр башланыр алдыннан һәр йортта яшәүчеләргә төзекләндерү буенча җентекле план-схема тәкъдим ителәчәк. Бүгенге көнгә белгечләр фикер алышулар үткәрә башлады инде, алар нәтиҗәләре буенча күпфатирлы йортларда урыннар милекчеләренең гомуми җыелышлары беркетмәләре төзелә.

Илсур Метшин билгеләп үткәнчә, программа белән бергә кешеләр белән төзекләндерү проектлары турында фикер алышу традициясе туды. «Еш кына очрашулар тыныч уза, кайвакыт халык проект турында кайнар фикер алыша: кемгәдер балалар өчен мәйданчыклар күбрәк кирәк, кемгәдер парковкалар, яшелләндерү һ.б. Тагын бер кат администрация башлыкларыннан халыкның һәр кисәтүен игътибарга алуларын сорыйм. Күпчелек фикерен исәпкә алып, әлбәттә», – дип өстәде шәһәр Мэры.

Программа объектларының тулы исемлеге белән Казанның рәсми порталында KZN.RU танышырга була. Үз ишегалларында эш барышын казанлылар, кайнар линия телефоны: +7(800)275-20-20, шулай ук программаның рәсми порталында контрольдә тота алачак.