Чаңгы узышлары йолдызлары Казанда Россия Кубогының V этабында җиңү өчен көрәшәчәк

Стартка олимпия чемпионнары Александр Большунов, Вероника Степанова һәм илнең башка танылган спортчылары чыгачак

Фото: Марат Мөгыйнов

(Казан шәһәре KZN.RU, 11 нче гыйнвар). Казанда Чаңгы узышлары буенча Россия Кубогының V этабы ачылды. Илнең 200 дән артык иң яхшы спортчысы катнашындагы масштаблы турнирны 10-15 нче гыйнварда Мирный чаңгы-биатлон комплексы кабул итә. Стартка өч тапкыр олимпия чемпионы Александр Большунов, олимпия чемпионы Вероника Степанова, яшьләр һәм юниорлар арасында дөнья чемпионы Мария Истомина, юниорлар арасында ике тапкыр дөнья чемпионы Савелий Коростелев, олимпия уеннарының ике тапкыр бронза призеры иясе Александр Терентьев, РФ чемпионы Сергей Ардашев, Россия чаңгычылары Иван Горбунов, Лидия Горбунова, Дарья Непряева һәм башкалар чыгачак. Татарстан Республикасыннан тугыз спортчы чыгыш ясый.

Ярышлар программасында 11 нче гыйнварда шәхси ярыш (ирекле стиль) бар. Хатын-кызлар өчен 10 км, ир-атлар өчен 15 км дистанция әзерләнгән, дип хәбәр итә Россия чаңгы узышлары федерациясе. Шулай ук бүген ярышларның беренче көне тәмамланганнан соң эстафета форматында шоу-ярыш узачак. Анда берничә этапта олимпия чемпионнары Александр Легков, Татьяна Сорина һәм Алексей Червоткин, РФ җыелма командасы спортчылары, һәвәскәр-ветераннар һәм башкалар катнашачак. Ярышлар 17:00 сәгатьтә башлана.

Шимбә көнне, 13 нче гыйнварда, ярышларда катнашучыларны спринт (классик стиль) көтә. 12:55 сәгатьтә чирекфинал башлана, аннан соң ярымфинал һәм финал узачак. Якшәмбе, 14 нче гыйнварда, 20 км дистанциядә скиатлон планлаштырылган. 9:50 сәгатьтә стартка – хатын-кызлар, 12:25 сәгатьтә ир-атлар чыгачак.

Ярышларга керү ирекле – тамашачылар һәм җанатарлар өчен мәдәни-күңел ачу программасы әзерләнгән. Шулай ук ярышларны казанлылар сылтама буенча онлайн карый алачак.

Спорт турниры «Мирный» чаңгы-биатлон комплексы адресы буенча уза: Яңа Дәүләки урамы, 2а, корп. 4. Ярышлар уздырылган урынга кадәр һәм кире юнәлештә автобус йөри. Аның хәрәкәт җәдвәлен сылтама буенча белергә мөмкин.

Исегезгә төшерәбез, «Мирный» спорт комплексының эш графигы ярышлар вакытында үзгәрде.

Шулай ук укыгыз

Барлык яңалыклар