Казан халкы тонометрларны бушлай тикшерә алачак

4 апрельдән 7 апрельгә кадәр «Ышанычлы бул! Исән бул!» стандартлаштыру, метрология һәм сынаулар дәүләт төбәк үзәге белгечләре көнкүреш тонометрларын бушлай тикшерәчәк.

Тонометрны тикшерүгә Журналистлар урамындагы 24 йорт адресы буенча 9:00 дан 17:00 гә кадәр алып килергә мөмкин. Беләзек тонометрыннан тыш, барлык төр тонометрлар да туры килә, дип хәбәр итә Казанның Сәламәтлек саклау идарәсе.

Исегезгә төшерәбез, тонометрның дөрес эшләве кан басымының төгәл күрсәткечләрен алуга йогынты ясый, бу үз чиратында йөрәк-кан тамырлары системасы сәламәтлеген күзәтергә мөмкинлек бирә.