Биржада акча эшләргә теләп, казанлы мошенникларга 1 млн сумнан артык акча күчергән

Ир-ат берничә кредит рәсмиләштергән һәм җинаятьчеләргә үзенең банк кушымтасына читтән торып керү мөмкинлеген биргән.

Фото: Денис Гордийко

(Казан шәһәре KZN.RU, 5 нче апрель). Казанның 67 яшьлек кешесе, мошенникларга ышанып, 1 млн сумнан артык акчасын югалткан.

Зыян күрүче полициягә берничә ел элек биржада акча эшләргә тырышканын сөйләгән. Быел март аенда ир-ат белән таныш булмаган кеше элемтәгә керә һәм биш ел эчендә кертелгән инвестиция буенча 2 млн сумнан артык сумма тупланганын хәбәр итә.

Әңгәмәдәш акчаны чыгарырга тәкъдим итә, моның өчен иминият суммасын һәм салымны түләргә кирәк була. Ир-ат 1 млн сумнан артык күләмдә берничә кредит рәсмиләштергән һәм шалтыратучыга үзенең банк кушымтасына читтән торып керү мөмкинлеген биргән. Акчаны мошенник билгесез счетларга күчергән.

Өч атна дәвамында ир-ат акча күчерүләрен көткән, әмма алар барыбер килмәгән. Нәтиҗәдә, зыян күрүче «Мәскәү» полиция бүлегенә мөрәҗәгать итә. РФ Җинаять кодексының 158 нче маддәсенең 3 нче «Урлау» өлеше буенча җинаять эше кузгатылган, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Шулай ук укыгыз

Барлык яңалыклар