Казан-2 вокзалында аз хәрәкәтләнүче пассажирлар өчен көтү залы ачылды

Кунаклар өчен махсус утыру урыннары, персоналны чакыру төймәсе һәм индукцион элмәк урнаштырылган

Фото: Денис Гордийко

(Казан шәһәре KZN.RU, 1 нче ноябрь). Казан-2 вокзалында аз хәрәкәтләнүче пассажирлар өчен 32 кв. метр мәйданлы зал ачылды. Әлеге урын терәк-хәрәкәт аппараты бозылган һәм начар күрүче кешеләр өчен яраклаштырылган утыру урыннары белән җиһазландырылган. Ә начар ишетүчеләр өчен индукцион элмәк урнаштырылган. Керү урынында персонал чакыру төймәсе бар.

Зал янында терминал бар, аның аша саңгыраулар һәм телсезләр тәүлек әйләнәсе дистанцион ярдәм ала ала. Белешмә видеотерминал ярдәмендә теләсә кайсы пассажир дежур хезмәткәрне чакыра һәм пассажирлар ташу, вокзал хезмәте һәм башка мәсьәләләр буенча киңәшләшә ала. Бу җайланма реаль вакыт режимында эшли.

Шулай ук аз хәрәкәтләнүче пассажирлар, вокзал комплексына килгәч, поездны көткәндә, вагонга утырганда яки аннан төшкәндә «РЖД» ААҖнең мобильлеккә ярдәм итү үзәге хезмәтләреннән файдалана ала. Моның өчен килүгә бер тәүлек кала +7(800)775-00-00 телефоны буенча, «РЖД пассажирларга» кушымтасында яки info@rzd.ru электрон адресы буенча озата баруга гариза язарга кирәк.

Ел башыннан Казан-2 вокзалы сәламәтлек мөмкинлекләре чикләнгән меңнән артык пассажирга хезмәт күрсәтте – бу 2022 елның шул ук чорына караганда 43% ка күбрәк, дип хәбәр итә ТР Транспорт һәм юл хуҗалыгы министрлыгының матбугат хезмәте.

Шулай ук укыгыз

Барлык яңалыклар