«Лапа дружбы» йомгаклау хәйрия акциясе Горки-Әмәт урманында 10 нчы сентябрьдә узачак

Казанлылар шәһәр приютыннан үзләренә ошаган этләрне ала алачак

Фото: Денис Гордийко

(Казан шәһәре KZN.RU, 6 нчы сентябрь). Горки-Әмәт урманында 10 нчы сентябрьдә «Лапа дружбы» чарасының йомгаклау хәйрия акциясе узачак. Казанлылар хайванны тапшыру турындагы килешү буенча шәһәр приютыннан үзләренә ошаган этләрне ала алачак, шуңа күрә үзең белән паспорт алырга кирәк. Кайбер этләр белән хәзер танышырга мөмкин.

Акциядә шулай ук ветеринария табиблары белән киңәшләшергә, лекцияләр тыңларга, «Яшь ветеринария» интерактив зонасында мастер-класста катнашырга, хәйрия ярминкәсендә йорт хайваннары өчен товарлар һәм тәм-томнар сатып алырга мөмкин булачак.

Акциянең партнерлары йорт хайваннарын өйләренә алып кайтачак яңа эт хуҗалары өчен махсус старт комплектлары әзерләгәннәр.

Лекцияләр җәдвәле:

14:00 – ветеринария табибы Алиса Гаеваның «Сәламәтлеккә 10 адым: эт авыруларын тумыштан алып бәхетле картлыкка кадәр профилактикалау» лекциясе;

15:00 – ветеринария табибы, зоопсихолог, кинолог, этләр һәм мәчеләрнең үз-үзләрен тотышы буенча белгеч Люция Фәйзиның «Этләр нәрсә турында сөйләшә» лекциясе;

16:00 – кинолог, этләрнең үз-үзләрен тотышы буенча белгеч Мария Титованың «Эт белән уңайлы һәм озын тормышка 10 адым» лекциясе.

Акция үзе 12:00 сәгатьтә этләрне йөртү мәйданчыгында башланачак.

Шулай ук «яхшылык өстәле» дә эшләячәк. Теләге булган һәркем азык, пеленкалар, савытлар һәм сеңдергечләр тапшыра алачак. Җыелган бар нәрсә акциядә катнашучыларга тапшырылачак.

Шулай ук укыгыз

Барлык яңалыклар