Казан шәһәрендә кыш дәвамында кар чистарту эшләре буенча 1 301 кагыйдә бозу очрагы билгеләнде

937 очрак буенча эшләрне җайладылар инде

Фото: Марат Мөгыйнов

Кыш дәвамында көчле кар яву Казан шәһәренең хезмәт оешмаларына һәм шәхси эшмәкәрләренә бик җитди сынау булды. Административ-техник инспекция идарәсе хезмәткәрләре 14 мең объектны тикшереп, территорияләрне һәм түбәләрне тәртипкә китерү эшләре буенча 1 301 кагыйдә бозу очрагын теркәгән. Бүгенге көндә 937 вәзгыять буенча эшләрне җайлаганнар. Тикшерүнең нәтиҗәләре турында аппарат киңәшмәсендә идарә тармагы җитәкчесе Артур Мухаметшин хәбәр итте.

Тәртипкә китерү эшләрен озакка сузган оешмаларга карата административ хокук бозу эшләре буенча эш ачылган. Барлыгы кышкы чорда 339 беркетмә төзелгән, тагын 55 эш буенча җаваплыларның аңлатмасын көтәләр.

«Кагыйдәләрне үтәү ул тәртип булу дигәнне аңлата. Әгәр дә вәзгыятьне тикшереп тормасаң, җаваплылыкка мәҗбүри тартачаклар – бу беркетмәләр, штрафлар һәм судлар аркылы мөмкин. Бер генә дә кагыйдә бозу очрагы беленми калынмады, күп очракны автомат рәвештә теркәү җайланмасы ачыклады», – дип ассызыклады Башкарма комитет җитәкчесе Рөстәм Гафаров.

Кагыйдә бозу очракларының күпчелеге социаль әһәмияткә ия объектларга – мәктәпләргә, хастаханәләргә, балалар бакчаларына һәм беренчел кирәк-ярак кибетләренә үтү һәм керү юлларында билгеләнгән. Зур игътибар түбәләр торышына бирелде, чөнки биек кар өемнәре, боз сөңгеләре кешеләр тормышына зыян китерергә мөмкин иде.

Агымдагы сезонда Казан шәһәрендә яңа күзәтү технологияләрен эшкә кертә башладылар. Хезмәт машиналарына урнаштырылган махсус техник чаралар автомат рәвештә чистартылмаган түбәләрне теркәп бардылар – ике көн рәттән җайланма түбәләрне фотосурәткә төшерде. Әгәр дә икенче көнгә түбә чистартылган булса, беркетмә төзелми. Кеше тормышына зыян китерердәй вәзгыять булганда, мәсәлән, озын һәм авыр боз сөңгеләре эленеп торса, бу очраклар тиз хәл ителергә тиеш.

Әлеге җайланма 48 кагыйдә бозу очрагын теркәгән. Киләсе сезонда барлык хезмәт машиналарында да автомат теркәү җайланмасы урнаштырылачак.

Шулай ук административ-техник инспекция идарәсе хезмәткәрләре 13 санкцияләнмәгән чыгарылган кар өемнәрен ачыклаган, аларның экологиягә зур зыян китерү мөмкинлеге бар. 7 «соры йөкче»гә административ эш ачылган.