Алты ел эчендә яңа «Мәгълүматлар икътисады» илкүләм проекты буенча якынча 700 млрд сум акча бүлеп биреләчәк

Владимир Путин 2030 елга икътисадның һәм социаль өлкәнең төп тармакларында цифрлы платформалар формалаштыру йөкләмәсе бирде

Фото: Марат Мөгыйнов

Россиядә «Мәгълүматлар икътисады» дигән яңа илкүләм проект барлыкка киләчәк. Алты ел эчендә аңа 700 млрд сумнан да ким булмаган күләмдә акча бүлеп биреләчәк. Бу хакта ил президенты Владимир Путин РФ Федераль Җыенына юлламасында белдерде.

Хәзерге заман шартларында хезмәт җитештерүчәнлегенең барлык өлкәләрендә нәтиҗәлелекне арттыру цифрлаштыру, ясалма интеллект технологияләре белән тыгыз бәйләнгән. Мондый карарлар гражданнар, бизнес һәм дәүләт арасында үзара хезмәттәшлекне оештырырга ярдәм итә торган цифрлы платформалар булдырырга мөмкинлек бирә, дип ышана дәүләт башлыгы.

«2030 елга икътисадның һәм социаль өлкәнең барлык төп тармакларында цифрлы платформалар формалаштырырга кирәк, дип саныйм. Бу һәм башка комплекслы мәсьәләләр яңа «Мәгълүматлар икътисады» илкүләм проекты кысаларында хәл ителәчәк. Алты ел эчендә аңа ким дигәндә 700 млрд сум акча юлланачак», – дип белдерде Владимир Путин.

Аның сүзләренә караганда, мондый технологияләр һәм платформалар дәүләт өчен икътисад үсешен планлаштыру, программалар һәм илкүләм проектлар белән нәтиҗәле идарә итү мөмкинлекләре ача.

«Иң мөһиме – без алга таба да хакимиятнең барлык дәрәҗәләрендәге эшне һәр кешенең, һәр гаиләнең мәнфәгатьләрен истә тотып төзи алачакбыз, гражданнарга һәм бизнеска проактив рәвештә, ягъни уңайлы форматта һәм нәтиҗәләрне тиз алуга исәпләнгән хезмәт күрсәтүне дәвам итәчәкбез. Сүз уңаеннан, Россия – дәүләт хезмәтләрен электрон рәвештә гамәлгә кертү буенча дөнья лидерларының берсе. Күпләрнең, шул исәптән Европа илләренең дә, әле безнең дәрәҗәгә җитәсе бар. Әмма без, үз чиратыбызда, бер урында тукталып калырга җыенмыйбыз», – диде РФ президенты.

Юлия Летникова

Шулай ук укыгыз

Барлык яңалыклар