Ярты ел эчендә Казан төзүчеләре 5 меңгә якын яңа агач утырткан һәм 40 мең кв. м дан артык мәйданда газон җәйгән

Шәһәрдә компенсация яшелләндерүе турында 107 күрсәтмә төзелгән.

(Казан шәһәре KZN.RU, 24-нче август, Ксения Швецова). Ярты ел эчендә Казанда төзүчеләр компенсация тәртибендә якынча 5 мең яңа агач утырттылар һәм 40 мең кв. м дан артык мәйданда газон җәйделәр. Шәһәрдә компенсация яшелләндерүе турында 107 күрсәтмә төзелгән, дип хәбәр итте бүген эшлекле дүшәмбедә Административ-техник инспекция идарәсе башлыгы Наил Минвәлиев.

Төзелеш башлану еш кына агачларны кисү һәм үлән капламын бозу зарурлыгы белән бәйле була – мондый очракларда йорт салучы компенсация яшелләндерүен башкарырга һәм параметрга бәйле рәвештә бер агач урынына өч яңасын утыртырга тиеш, дип хәбәр итте Н.Минвәлиев.

Быел Административ-техник инспекция идарәсе контроленә компенсация утырту турында 107 күрсәтмә килгән. Аларның 25-е буенча барлык эшләр башкарылган һәм актлар белән расланган. Эшне башкармаган өчен 12 беркетмә төзелгән, – дип хәбәр итте спикер. – Тугыз документ буенча, кризислы чорның кыенлыкларын исәпкә алып, сроклар күчерелде».

Агачлар арасында һәм газоннарда парковка ясаучы шәһәрлеләрдән барлыкка килгән зыян проблемасы да бар, дип өстәде Административ-техник инспекция идарәсе башлыгы.

«Якында гына машина кую урыннары була торып һәм газонда калдырган өчен 2,5 мең сумга кадәр штрафлар янауга карамастан, шәһәрлеләр транспортларын газоннарда калдыруны дәвам итә», – диде ул. Агымдагы елның май һәм июнь айларында гына да, Н.Минвәлиев сүзләренчә, автомат режимда эшләүче махсус техник чаралар ярдәмендә 7841 административ материал теркәлгән һәм карауга юнәлтелгән.