Атна эчендә Казанның ашыгыч ярдәм хезмәте 80 тапкыр бала табу очракларына барган

Узган атнада ашыгыч ярдәмгә барлыгы 7273 чакыру килгән.

(Казан шәһәре KZN.RU, 27-нче май). 20-нчы майдан 26-нчы майга кадәрге атнада Казанның ашыгыч ярдәм хезмәтенә 7273 чакыру килгән, 1366 очрагы җәмәгать урыннарына бару белән бәйле.

Төрле авырулар сәбәпле ашыгыч ярдәмгә 5680 казанлы мөрәҗәгать иткән. Аерым алганда, көчле миокард инфаркты буенча 46 очрак һәм мидәге кан әйләнеше бозылу буенча 192 очрак теркәлгән. Бала табу очраклары уңаеннан табибларга 80 чакыру килгән.

881 чакыру бәхетсезлек очраклары белән бәйле. Юл-транспорт вакыйгалары белән бәйле очракларга 48 тапкыр чакыртылганнар, аларда 48 кеше зыян күргән, 19 кеше хастаханәгә озатылган, берсе үлгән. Янгын очракларына табиблар 20 тапкыр чакыртылган, дип хәбәр итә «Казанның ашыгыч медицина ярдәме станциясе» дәүләт автоном сәламәтлек саклау учреждениесе.

Шулай ук укыгыз

Барлык яңалыклар