Ел йомгаклары буенча Казанның тулаем территориаль продукты күләме рекордлы 1 трлн 300 млрд сумны тәшкил итәчәк

ТР рәисе билгеләп үткәнчә, һәр төбәктә дә мондый күрсәткечләр юк

Фото: Денис Гордийко

2023 ел йомгаклары буенча Казанда сәнәгать җитештерүе индексы 102,1% ны тәшкил иткән. Үзебездә җитештерелеп озатылган товар күләме 701,5 млрд сум (109%) булган. Ә тулаем территориаль продукт күләме ел йомгаклары буенча рекорд куя – ул 1 трлн 300 млрд сумнан артык булыр дип көтелә. Бу хакта Казан шәһәр Думасының XXVIII сессиясендә ТР башкаласы мэры Илсур Метшин сөйләде. Совет районы администрациясендә узган утырышта ТР рәисе Рөстәм Миңнеханов та катнашты.

Республика башлыгы тулаем территориаль продукт буенча шәһәрнең югары күрсәткечләргә ия булуын билгеләп үтте. «Тулаем территориаль продукт күләме триллион сумнан арткан төбәкләр күп түгел. Бу зур икътисади үзәк, аның ярдәмендә эш урыннары барлыкка килә һәм һәрвакыт продукция бар. Әлбәттә, мондый нәтиҗәләргә дәүләт башлыгы, хөкүмәт ярдәменнән башка ирешә алмаган булыр идек», – дип ассызыклады ТР рәисе.

Агымдагы катлаулы тышкы сәясәт шартларында шәһәр предприятиеләре, дус илләрдән чимал белән тәэмин итүчеләргә йөз тотып һәм илебездә җитештерелгән җиһазларга күчеп, эшне уңышлы оештыруга ирешкәннәр. Әйтик, Казанның металл эшләнмәләр, компьютерлар, электроника һәм оптика, электр җиһазлары, тукыма эшләнмәләре һәм азык-төлек продуктлары җитештерүче предприятиеләре югары җитештерүчәнлек күрсәткән.

«Җәмгыятьнең киләчәккә уңай өметләре инвестицияләр үсешендә дә чагылыш таба. Ел йомгаклары буенча аларның күрсәткече 335 миллиард сумга якынлаша, бу, узган ел белән чагыштырганда, 46,5 миллиардка күбрәк. Икътисадка кертелгән акча – шәһәрнең тотрыклы үсешенә ышану нәтиҗәсе», – дип билгеләп үтте Илсур Метшин.

Республика башлыгы игътибарны салымның вакытында түләнми калган өлешенә юнәлтергә чакырды – ТР башкаласында бу юнәлештә эшне көчәйтергә кирәк, дип саный ул. «ТРда формалаша торган акчалар күләме – 1 триллион 553 миллиард – бу салым, таможня һәм иминият кертемнәре. Федераль, республика һәм муниципаль бюджетларны формалаштыручы җитди саннар. Ләкин акча җитми», – диде рәис.

Рөстәм Миңнеханов фикеренчә, шәһәрдә федераль үзәк ярдәме белән юл инфраструктурасын үстерү буенча зур эш алып барыла. Бүгенге көндә Казан өчен беренчел әһәмияткә ия проектлар – Вознесенский тракты (юлның беренче участогы узган елда төзелде) һәм Горький шоссесы төзелешләре. «Казанда шәһәр үзәгеннән аның читенә турыдан-туры алып чыга торган ике трасса төзелә, аларны эшләтеп җибәрү өчен безгә быел, ким дигәндә, 25 млрд сум акча кирәк», – дип хәбәр итте рәис.

Камилә Вилданова, Диләрә Гафурова