Казанда беренче тапкыр яшүсмергә донор бөерен күчереп утырттылар

15 яшьлек кыз Республика балалар клиник хастаханәсенә авыруның бишенче стадиясендә керә

Фото: Денис Гордийко

(Казан шәһәре KZN.RU, 19 нчы гыйнвар). Татарстан башкаласында беренче тапкыр балага донор бөерен күчереп утырттылар. Трансплантация буенча операцияне Республика балалар клиник хастаханәсе һәм Республика клиник хастаханәсе табиблары командасы үткәрде. Орган күчереп утырту унбиш яшьлек кызның гомерен саклап калган.

ТР Сәламәтлек саклау министрлыгында хәбәр итүләренчә, узган ел Республика балалар клиник хастаханәсенә бишенче стадиядәге хроник бөер авыруы белән авыручы пациент килгән. Бала озак вакыт бөер алмаштыру терапиясе ала, бу очракта орган трансплантациясен башкару өчен күрсәтмәләр ачыклана.

Табиблар командасы Республика балалар клиник хастаханәсе базасында балага бөер трансплантациясе үткәрергә карар итә. Диагностика һәм медикаментоз терапияне үз эченә алган әзерлек этабыннан соң, пациентка донор органын күчереп утырталар. Операция дүрт сәгатькә якын дәвам итә. Шуннан соң кыз реанимация бүлегендә табиблар күзәтүе астында була.

Операциядән соң терапия уңышлы үтә – күчерелгән бөер эшли башлый. Хәзерге вакытта яшүсмер үзен канәгатьләнерлек хис итә.

Операцияне әзерләүдә һәм үткәрүдә табиб-хирурглар, урологлар, нефрологлар, реаниматологлар, анестезиологлар, функциональ диагностика белгечләре катнаша.

Бүгенге көндә төбәктә хроник бөер авырулары булган һәм бөер алмаштыру терапиясе алган балалар базасы бар, алар трансплантациягә мохтаҗ. Балаларга бөер күчереп утыртуның уңай тәҗрибәсе аларга тулы тормыш алып барырга мөмкинлек бирәчәк, дип саный баш табибының хирургия бүлеге буенча урынбасары Михаил Поспелов. Аның сүзләренчә, Татарстанның өлкәннәрдә органнар трансплантациясе өлкәсендә зур тәҗрибәсе бар, ә хәзер мондый уникаль тәҗрибә балалар практикасында барлыкка килгән. «Трансплантациягә һәм донорлыкка җәмгыятьтә уңай караш формалаштыру бик мөһим», - диде белгеч.

2023 елда Республика балалар клиник хастаханәсе табиблары командасы академик Валерий Шумаков исемендәге Трансплантология һәм ясалма органнар үзәгендә бөер трансплантациясен үткәрү буенча укулар, шулай ук дөньяда әйдәп баручы балалар бөере трансплантациясе үзәкләренең берсендә чит ил стажировкасы узды. Бу клиникага ТРда балалар сәламәтлеген үстерүдә яңа дәрәҗәгә күчәргә мөмкинлек бирде.

Шулай ук укыгыз

Барлык яңалыклар