Казанның һава аланы елына 2 миллионнан алып 4 миллион пассажирга кадәр категориядә Россия аэропортлары арасында иң яхшысы дип танылды

2021 елда 3 млн 876 мең пассажирга хезмәт күрсәтелгән – бу 2019 ел күрсәткечләреннән артыграк.

Фото: Марат Мөгыйнов

(Казан шәһәре KZN.RU, 9 нчы февраль). 9 нчы февральдә NAIS-2022 гражданнар авиациясе инфраструктурасының илкүләм күргәзмәсе кысаларында «Россиянең һава капкалары» премиясен тапшыру тантанасы булды. «Елга 2 миллионнан алып 4 миллион пассажирга кадәр хезмәт күрсәтүче иң яхшы аэропорт» номинациясендә 2021 ел нәтиҗәләре буенча Г.Тукай исемендәге Казан халыкара аэропорты җиңде.

«Казан» халыкара аэропорты» АҖ генераль директоры Сергей Романцов билгеләп үткәнчә, бу җиңү һава аланы коллективының югары бүләге һәм хезмәт нәтиҗәсе булып тора. «12 ай нәтиҗәләре буенча без 3 млн 876 мең пассажирга хезмәт күрсәттек, бу пандемиягә кадәрге 2019 ел күрсәткеченнән 11,7% ка артык. Предприятие тармак экспертлары белән зур эш алып бара, хезмәт җитештерүчәнлеген арттыру максатларында алдынгы технологияләр куллана, тәҗрибәле һәм квалификацияле персоналга ия, шулай ук пассажирларга хезмәт күрсәтүнең барлык этапларында сервис өлешенә аерым игътибар бирелә», – дип ассызыклады ул.

Исегезгә төшерәбез, хәзерге вакытта Казан аэропортына керү юлында борылыш эстакадасының торык корылмасы төзелеше дәвам итә. Борылыш эстакадасын төзү эшләре «Казан Экспо» халыкара күргәзмә комплексы янында Р239 Казан – Оренбург трассасындагы аэропортка керү юлын реконструкцияләү кысаларында алып барыла.

Шулай ук укыгыз

Барлык яңалыклар