Вокал, арт-остаханә һәм адаптив вин-чун: «Симург» инклюзив ял үзәгендә яңа түгәрәкләр ачылачак

Шулай ук сәламәтлек мөмкинлекләре чикләнгән балалар программалаштыру, робототехника, актерлык осталыгы буенча бушлай дәресләргә йөри ала

Фото: Денис Гордийко

(Казан шәһәре KZN.RU, 17 нче август). Яңа уку елында «Симург» инклюзив ял итү үзәгендә яңа түгәрәкләр ачылачак. Сәламәтлек мөмкинлекләре чикле балалар вокал, адаптив физик культура (вин-чун) һәм арт-остаханә дәресләренә бушлай йөри алачак, дип хәбәр иттеләр «Синең файдага» фондында.

Вокал дәресләрендә балалар дөрес сулыш алу техникасын өйрәнә, тавыш диапазонын киңәйтә, шулай ук тамашачылар алдында чыгыш ясый алачак.

Арт-остаханәдә балаларны төрле рәсем техникасына, мәсәлән, карандаш, гуашь һәм буяулар белән рәсем ясарга, шулай ук әвәләп әйберләр ясарга, кәгазь һәм төрле материаллар белән эшләргә өйрәтәчәкләр.

Адаптив вин-чун дәресләрендә балалар ушуның гамәли юнәлеше дип саналган Кытай сугыш сәнгатенең нигезләрен үзләштерәчәкләр. Бу спорт төре белән шөгыльләнү балага физик формасын үстерергә ярдәм итәчәк.

Моннан тыш, «Симург»та программалаштыру, робототехника, актерлык осталыгы буенча түгәрәкләр ачылган.

Дәресләр 7 яшьтән 14 яшькә кадәрге балалар өчен үткәрелә. Түгәрәкләргә йөрергә теләүчеләр 27 нче августка кадәр сылтама буенча гариза тутыра ала.