«Студентлар язы» фестиваленең һәр аерым югары уку йортында узган этабында 10 меңнән артык студент катнашкан

Беренче концерт 10 апрельдә Казан дәүләт медицина университетында узачак

Денис Гордийко фотосы

Казанда 10 меңнән артык студент «Студентлар язы»на әзерләнә. Югары уку йортларында сайлап алу этаплары узган инде. Бу хакта эшлекле дүшәмбедә Балалар һәм яшьләр эшләре комитеты рәисе Дмитрий Хвостиков хәбәр итте.

Татарстанның төрле шәһәрләреннән җыелган 16 студентлар командасы ике атна дәвамында үзләренең бәйге программаларын тәкъдим итәчәк. 10 апрельдә беренче булып иҗади эшләрен Казан дәүләт медицина университеты студентлары тәкъдим итәчәк.

Дмитрий Хвостиков Казан яшьләренең зур уңышын искә төшерде: узган елның көз аенда Казанда «Студентлар язы»ның бөтенроссия этабы уздырылган, анда Казан студентларыннан оештырылган Татарстан делегациясе 2019 елдан бирле беренче тапкыр гомуми зачетта гран-при яулаган.

Йомгаклау этабында Казан һәм республиканы тәкъдим итәчәк иң яхшы коллективларның һәм башкаручыларның исемнәре май аенда узачак гала-концертта билгеле була, ди оештыручылар.

Шул ук вакытта һөнәри белем бирү оешмалары студентлары өчен дә иҗади бәйгеләр уза. Быел үзенең 30 еллыгын билгеләп үтә торган «Весенняя капель – Язгы тамчы» фестивале Казанның һәм Татарстанның 32 уку йортыннан ике меңнән артык катнашучыны берләштергән.

Конкурс программасы 31 мартка кадәр дәвам итәчәк.

Алдарак Казанда «Созвездие – Йолдызлык» фестиваленең шәһәр этабы тәмамлануы хакында хәбәр ителгән иде. Татарстан башкаласын республика дәрәҗәсендә тәкъдим итәчәк җиңүчеләрнең исемнәре иртәгә, 24 мартта билгеле булачак.