Владимир Путин РФ Конституциясенә төзәтмәләр буенча тавыш бирүне 22 апрельдә уздыру турындагы указны раслады

Тавыш бирү илдәге эпидемиологик вәзгыятькә бәйле рәвештә күчерелә.

(Казан шәһәре KZN.RU, 18-нче март). Россия Президенты Владимир Путин Конституциягә төзәтмәләр кертүне хуплау мәсьәләсе буенча 22-нче апрельгә гомумроссия тавыш бирүен билгеләү турында указга кул куйды. Президент Үзәк сайлау комиссиясе рәисе Элла Памфилова белән очрашу үткәрде, аның барышында тавыш бирү илдәге эпидемиологик вәзгыятькә бәйле рәвештә күчерелергә мөмкин, дип хәбәр итте.

Үзәк сайлау комиссиясе Россия Федерациясе Конституциясен үзгәртү буенча бөтенроссия тавыш бирүенә әзерләнә башлады инде, дип билгеләп үтте дәүләт башлыгы. Закон нигезендә тавыш бирүне тиешле указ басылып бер айдан да иртәрәк булмаган вакытта уздырырга кирәк. Законда тавыш бирүне уздыруның иң чик срогы күрсәтелмәгән, дип ассызыклады В.Путин.

«Гражданнар кабул ителә торган карарларның бөтен мөһимлеген аңлап, сайлау участокларына килеп, Конституциягә тәкъдим ителә торган үзгәрешләр турында үз фикерләрен белдерүләренә ышанам, - дигән Президентның сүзләрен китерә kremlin.ru сайты. - Бу ил өчен һәм безнең дәүләтнең социаль характерын ачу өчен бик мөһим. Халыкара хокук өстенлеге турындагы карарыбызны кабул итәргә, традицияләребез, мәдәниятебез, тарихыбыз белән бәйле башка принципиаль әйберләрне билгеләргә һәм моны Россиянең Төп законында билгеләп үтәргә кирәк.

Әмма тавыш бирү эпидемиологик вәзгыять мөмкинлек биргән очракта гына узачак, дип өстәде В.Путин. «Безнең гражданнарның сәламәтлеге һәм тормышыннан да мөһимрәк нәрсә юк. Бүгенге хәлдән чыгып карарбыз», - дип ассызыклады дәүләт башлыгы. Ул шулай ук сайлау комиссиясе белгечләрен, закон таләпләрен үтәп, үткәрү өчен, бөтенроссия тавыш бирүенә әзерлек эшләрен дәвам итәргә өндәде.

Шулай ук укыгыз

Барлык яңалыклар