Владимир Путин Мәскәү – Казан М12 трассасы буенча йөрү бәясен тикшерергә вәгъдә итте

Туры элемтә барышында ил халкының берсе әлеге юл буенча йөрү тарифларына зарланды

Фото: kremlin.ru

(Казан шәһәре KZN.RU, 14 нче декабрь, Диана Жиленкова). Россия Президенты Владимир Путин ел саен уздырыла торган матбугат конференциясе барышында Мәскәү – Казан М12 трассасы буенча йөрү бәясен тикшерергә вәгъдә итте.

Моның буенча Мәскәү кешесе мөрәҗәгать итте, аның исәпләве буенча Мәскәүдән Казанга кадәр юл автомобильчеләргә якынча 6 мең сумга төшәчәк. Аның сүзләренчә, җиңел автомобиль өчен магистральнең яңа гына ачылган участогында тариф километрына уртача 7 сум тәшкил иткән.

«Бер ел элек «Автодор» бер километрына – 4 сум һәм Мәскәү – Казан трассасының бөтен юлында йөрү бәясе 3 меңнән 4 мең сумга кадәр булачак дип җиткерде. Владимир Владимирович, зинһар, тиешле ведомстволарга М12 буенча юл йөрү тарифларын киметү өчен тарифларны карап чыгарга кушсагыз иде», – дип мөрәҗәгать итте Президентка Сергей Гвоздев-Карелин.

Владимир Путин башкала кешесе китергән мәгълүматларны төгәл белмим дип җиткерде. «Мин, дөресен генә әйткәндә, әлеге санның кайдан килеп чыкканын белмим – 6 мең? Бәлки, һәр участокта да бер үк бәя булмас? Саннар 4-4,5 мең булырга тиешлеген беләм. Тикшерермен. Бәлки, мондый туры арифметика монда бик үк эшләп бетермидер. Мин, һичшиксез, моны карарга вәгъдә итәм», – диде дәүләт башлыгы.

Ул искәрткәнчә, закон буенча юллар альтернатив юллар булганда гына түләүле була ала. «Түләмәү һәм бушлай йөрү мөмкинлеге һәрвакыт бар. Әмма анда үз катлаулылыгы була», – дип йомгаклады Владимир Путин.

Шулай ук укыгыз

Барлык яңалыклар