Владимир Путин Казанның БРИКС саммитын уздыру урыны итеп сайлануын аңлатты

Дәүләт башлыгы ТР башкаласының югары дәрәҗәдә үсеш алуын билгеләп үтте

Фото: Марат Мөгыйнов

(Казан шәһәре KZN.RU, 14 нче декабрь). Казанның БРИКС саммитын уздыру өчен мәйданчык итеп сайлануы шәһәр һәм Татарстанның югары үсеш дәрәҗәсе белән бәйле. Бу хакта туры линия һәм матбугат конференциясе барышында РФ Президенты Владимир Путин белдерде.

«Татарстан яхшы үсеш ала, ә Казан – мондый үсешнең иң яхшы мисалларының берсе. Элекке президент һәм хәзергесе – Миңнеханов яхшы эшли. Без нәтиҗәне күрәбез. Минтимер Шәрип улы белән йөргәнемне хәтерлим, без өйләр буенча йөрдек, беләсезме, мине нәрсә шаккаттырды: аларны өй дип тә атап булмый иде, җир йортлары. Бу 2000 еллар башында иде. Бу сүзнең тулы мәгънәсендә җир йортлары, ләкин барысы да шулкадәр чиста иде. Миндә әле дә шундый тыйнак шартларда яшәгән, әмма барысын да шул дәрәҗәдә тоткан кешеләргә карата хөрмәт хисе сакланып калган. Халыкның эчке мәдәнияте дәрәҗәсе хөрмәт уята. Татарстанның, Татарстан башкаласының, Казан шәһәренең ышанычлы үсеше дә шуның белән бәйле», – дип билгеләп үтте дәүләт башлыгы.

Россия лидеры Татарстан башкаласында инфраструктура үсешенең югары дәрәҗәсенә басым ясады.

«Казан берничә эре халыкара, спорт һәм сәяси чаралар үткәрде. Табигый рәвештә җәлеп итү үзәгенә әверелә. Татарстан – күпмилләтле, күп конфессияле республика. Конфессияләр арасында мөнәсәбәтләр тиешенчә төзелгән. Бөтен ил өчен яхшы үрнәк», – дип саный Владимир Путин.

БРИКС саммиты 2024 елның октябрендә Казанда узачак.

Шулай ук укыгыз

Барлык яңалыклар