Яңалыклар
23.11.2022, 11:09
Мамадыш трактында һәм П.Лумумба урамында хәрәкәтне оптимальләштерү проектларын эшләү алып барыла
Финанслау бүленсә, аларны тормышка ашырырга планлаштыралар.
Фото: Марат Мөгыйнов
(Казан шәһәре KZN.RU, 23 нче ноябрь, Юлия Летникова). Казанда Мамадыш трактында һәм П.Лумумба урамында юл хәрәкәтен оптимальләштерү проектлары эшләнә. Финанслау бүленсә, аларны тормышка ашырырга планлаштыралар. Бу хакта ТР Министрлар Кабинетында узган брифингта Казан Башкарма комитеты җитәкчесе урынбасары Игорь Куляжев хәбәр итте.
Ул билгеләп үткәнчә, хәзер Мамадыш трактында хәрәкәтнең тоткарлануы күзәтелә – күбрәк торак комплекслар төзелгән һәм светофор урнаштырылган урында (Рахлин урамы белән кисешкән урында). «Бу участокта без юл чишелешен проектлыйбыз, ул әлеге чатны туктамыйча үтәргә мөмкинлек бирәчәк. Ике борылыш элмәге булачак, турыга һәм сулга хәрәкәт итү тыелачак», - дип хәбәр итте И.Куляжев. Проект буенча автомобиль юлын киңәйтү каралмаган.
П.Лумумба урамы буенча да хәрәкәтне оптимальләштерү планлаштырыла. «Бу иске аэропорттан Совет районы хакимияте буенча Космонавтлар урамына кадәрге участок. Казанның Генераль планы буенча алты полосалы юл узарга тиешле коридор бар, Космонавтлар һәм Патрис Лумумба урамнары чатында юл үткәргеч һәм чишелеш барлыкка килергә тиеш», – дип аңлатты Казан Башкарма комитеты җитәкчесе урынбасары. Аның сүзләренә караганда, бу ике проект инде тәмамлану стадиясендә: «Без аларны алга китеп әзерлибез. Проектларны әзерлибез, алар дәүләт экспертизасын узачак. Финанслау булса, гамәлгә ашыра башлыйбыз».
И.Куляжев искәрткәнчә, быел Казанда юл эшләренә 25,6 млрд сум бүлеп бирелгән, шуның 16 млрд 700 млн сумы – урам-юл челтәре объектларын төзүгә һәм реконструкцияләүгә.
Зур масштаблы шәһәр проектлары турында сөйләгәндә, докладчы 12 км озынлыктагы Вознесение тракты төзелүен билгеләп үтте. Участокта 5 җир асты һәм 2 җир өсте җәяүлеләр кичүе, 4 юлүткәргеч һәм Нокса елгасы аша күпер төзеләчәк.
«Проектларны әзерлибез, алар дәүләт экспертизасын узачак. Финанслау булса, гамәлгә ашыра башлыйбыз»
Казан Башкарма комитеты җитәкчесе урынбасары
Адмиралтейство буасыннан алып Барлык диннәр гыйбадәтханәсенә кадәр Горький шоссесы төзелешенең икенче участогында эш тәмамлануга якынлаша. И.Куляжев сүзләренә караганда, быел аны файдалануга тапшыру планлаштырыла. Исегезгә төшерәбез, 1,5 км озынлыктагы дублер юл 2021 елда Несмелов урамыннан Адмиралтейство буасына кадәр беренче участокта төзелгән иде. Горький шоссесы дублер юлының өченче участогында, Барлык диннәр гыйбадәтханәсеннән М7 трассасына кадәр, проект-смета документациясе төзелгән һәм дәүләт экспертизасы үткәрелгән. Финанслауны раслау көтелә, шуннан соң эш башланачак.
Шулай ук быел Магистраль урамыннан Девятаев урамына кадәр Мехчылар урамы участогында Зур Казан боҗрасы төзелеше тәмамланды. Салават Күпере һәм Осиново бистәсен Горький шоссесы белән тоташтыручы Осиново урамы буенча юл ачылды.
И.Куляжев искәрткәнчә, быел Казанда 22 млн кв. м урам җыештырылачак. Шәһәр урамнарын кардан һәм боздан 579 берәмлек махсус техника чистартачак, шул исәптән «Амкодор» шассиенда 4 роторлы кар чистарткыч һәм КамАЗ шассиенда ел әйләнәсенә яраклы 49 катнаш юл машинасы. Юлларны һәм тротуарларны эшкәртү өчен 74 мең тонна ком-тоз катнашмасы, 11 мең тоннадан артык ике фазалы реагент әзерләнгән, декабрьдә өстәмә рәвештә 6,6 мең тонна реагент сатып алыначак. Кар тәүлегенә гомуми җитештерүчәнлеге 15,6 мең кубометр булган 7 пунктта утильләштереләчәк. Көчле кар яву очрагына өстәмә рәвештә карны вакытлыча җыюның 10 урыны килешенгән.
Шулай ук укыгыз
-
28.04.2025, 17:54 -
28.04.2025, 16:10 -
28.04.2025, 15:28 -
28.04.2025, 15:14
