Татарстанда халыкка социаль ярдәм чаралары күрсәтү өчен «Кайгырту» платформасы эшли башлады

Сервис ташламалар алу өчен гариза бирергә һәм мөрәҗәгать статусын күзәтеп торырга мөмкинлек бирә.

Фото: Денис Гордийко

(Казан шәһәре KZN.RU, 2-нче февраль, Алена Мирошниченко). Татарстанда халыкка социаль ярдәм чараларын күрсәтү өчен «Кайгырту» платформасы эшли башлады. Сервис республика халкына нинди ташламаларга ия булуларын белергә, аларны алу өчен гариза бирергә һәм үз мөрәҗәгатьләренең статусын күзәтеп торырга мөмкинлек бирәчәк. Хәзерге вакытта, яңа платформа ярдәмендә, татарстанлылар өчен каралган 59 ярдәм чаралсының 8-ен рәсмиләштерергә мөмкин. Бу ел дәвамында мөмкин булган чаралар санын 15-кә кадәр җиткерү планлаштырыла. Бүген Татарстан Республикасы Министрлар Кабинетында узган брифингта сервис турында тулырак мәгълүмат белән Татарстан Республикасының хезмәт, мәшгульлек һәм социаль яклау министры Эльмира Зарипова һәм Татарстан Республикасының дәүләт идарәсе, мәгълүмат технологияләре һәм элемтә министры урынбасары Радик Гыйсмәтов таныштырды.

Бүгенгә «Кайгырту» сервисы инвалидларга торак-коммуналь хезмәтләр өчен түләүгә субсидия-ташлама, балага айлык пособие, балалар бакчасы өчен ата-аналар түләвенә төп һәм өстәмә компенсация, күпбалалы гаиләләргә торак-коммуналь хезмәтләр, юл һәм дару өчен субсидия-ташлама, пенсионерларга юлда йөрү өчен айлык түләү алырга мөмкинлек бирә.

Түләү алу өчен гариза биргәндә платформа вакытны 20%-ка кадәр экономияли. Кулланучыларга мәгълүматларны мөстәкыйль рәвештә күрсәтү кирәк түгел: барысы да чат-ботлар ярдәмендә тутырыла һәм автомат рәвештә тикшерелә. Моннан тыш, сервис халыкка, аның цифрлы профилендә саклана торган мәгълүматтан чыгып, мөмкин булган ярдәм итү чаралары турында хәбәр итә. Нәтиҗәдә, кулланучылар субсидия алу өчен өч тапкыр кимрәк адым ясый һәм үзләренә кирәкле ярдәм чарасын 12 тапкырга тизрәк таба.

Республика халкы шулай ук бирелгән гариза статусын күзәтеп тора һәм түләүләрне алуның төгәл срокларын белә ала. Платформага кертелгән калькулятор түләүләрнең суммасын исәпләргә ярдәм итәчәк.

Түләүләр алу өчен татарстанлылар үзләренең банк карталарын бәйли ала. Ел ахырына кадәр платформада яңа «МИР» картасына заказ бирү мөмкинлеге барлыкка киләчәк, дип билгеләп үтте Радик Гыйсмәтов. Моннан тыш, монда балалары булган, шул исәптән күпбалалы гаиләләр өчен билгеләнгән тагын 7 яңа ташлама барлыкка киләчәк. 2021 елның икенче кварталында программаны тулысынча татар теленә тәрҗемә итү планлаштырыла, дип өстәде спикер.

Кушымтаны App Store һәм Google Play да, шулай ук Zabota.Tatar.ru сайтында күчереп алырга мөмкин. Р.Гыйсмәтов билгеләп үткәнчә, бүгенгә программаны 87 кулланучы күчереп алган, һәм алар инде уңай бәяләмәләр калдыра башлаган.

Шулай ук укыгыз

Барлык яңалыклар