Татарстанда кискен респиратор-вирус инфекциясе һәм грипп белән авыручылар саны бер атна эчендә якынча 8 процентка арткан

Табиблар тарафыннан 12,3 меңнән артык авыру очрагы теркәлгән

Фото: Марат Мөгыйнов

11 нче марттан 17 нче мартка кадәр Татарстанда грипп һәм кискен респиратор-вирус инфекциясе белән авыруның 12 мең 309 очрагы теркәлгән. Бу алдагы атна күрсәткечләреннән 7,8% ка күбрәк, әмма, 2023 елның шул ук чоры белән чагыштырганда, 13,3% ка азрак.

Тема буенча материаллар:

Вакцинация, өзлегүләр һәм дәвалау – грипп белән авырганда нәрсә эшләргә?

Грипп вируслары арасында B штаммы өстенлек итә – аңа авыру очракларының 81,3% ы туры килә. Шулай ук гриппоз булмаган этиологияле вируслар: РС-вирус, бокавирус, парагрипп, аденовирус, риновирус, метапневмовирус, сезонлы коронавирус (аны пациентларның 86,2% ында ачыклаганнар) йөри.

Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР буенча идарәсендә хәбәр итүләренчә, төбәктә эпидемиологик вазгыять тотрыклы, авыруларның югары ноктасы үтелгән. Шуңа да карамастан, профилактикага игътибар итү зарур.

Республика халкына кешеләр күпләп җыела торган урыннарда һәм җәмәгать транспортында булу вакытын кыскартырга, битлекләр кулланырга һәм авыру билгеләре булган кешеләр белән контактка кермәскә киңәш итәләр.

Инфекцияләр йогуны кисәтүдә кулларны сабын белән яхшылап юу, бүлмәләрне даими җилләтү ярдәм итәчәк. Гаджетларны, төрле өслекләрне һәм башка техниканы антисептик белән сөртеп торырга кирәк. Ә иммунитетны күтәрү өчен туклану рационына C витамины булган продуктларны (мүк җиләге, нарат җиләге, лимон һ.б.) күбрәк кертү, спорт белән шөгыльләнү, зарарлы гадәтләрдән баш тарту һәм туйганчы йоклау мөһим.

Шулай ук укыгыз

Барлык яңалыклар