Яңалыклар
16.07.2021, 13:39
Татарстанда 32 Британия һәм 41 Һинд коронавирус штаммы инфекциясе ачыкланган
Июнь ае белән чагыштырганда, республикада авырулар 60%-ка арткан.
Фото: Денис Гордийко
(Казан шәһәре KZN.RU, 16-нчы июль, Ксения Швецова). Татарстанда июльнең беренче ике атнасында яңа коронавирус инфекциясе белән чирләү узган ай белән чагыштырганда 60 процентка диярлек арткан. Авыруларның артуын белгечләр 25-нче июньнән башлап терки, бүген уртача үсеш 0,2% тәшкил итә. Бу хакта «Татар-информ» мәгълүмат агентлыгында узган матбугат конференциясендә Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе җитәкчесе урынбасары Любовь Авдонина сөйләде.
Авырулар санының алга таба үсеше фаразлана
«Әлегә бездә вакцинация узмаган, COVID-19-га иммунитеты булмаган шактый күп кеше барлыгын исәпкә алып, алга таба үсешне фаразларга мөмкин, – дип аңлатты Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең ТР идарәсе җитәкчесе урынбасары. – Вакцинация – авыруны профилактикалауның һәм авыр нәтиҗәләрдән саклануның бердәнбер ысулы. Бары тик иммунизация генә пандемиянең таралу темпларын киметергә мөмкинлек бирәчәк».
Узган тәүлектә Татарстанда коронавирус белән авыруның 51 очрагы ачыкланган, шуларның 19-ы Казанда. Соңгы тәүлек эчендә 71 кеше сәламәтләнгән, ә пандемия башланганнан бирле – 20 мең 733 кеше. 32 Британия һәм 41 Һинд штаммы теркәлгән, дип өстәде Л.Авдонина һәм вакцинация барлык танылган штаммнардан саклый дип ассызыклады.
14 календарь көнгә сузылган медицина күзәтүе астында 1625 кеше кала, алар авырулар белән элемтәдә булган. Тәүлек эчендә республикада 8 мең 332 тест үткәрелгән, ә Татарстанда 2 млн 985 тест башкарылган, 209 мең кеше колачланган.
Казанда яңа мобиль вакцинация пункты ачылды
16-нчы июльгә булган мәгълүматларга караганда, Татарстанда COVID-19-дан 709 мең 203 кеше прививка ясаткан, шул исәптән 11 мең 335-е – соңгы тәүлек эчендә. Икенче дозаны 459 мең 289 кеше алган, дип хәбәр итте ТР Сәламәтлек саклау министры урынбасары – Казан буенча Сәламәтлек саклау идарәсе җитәкчесе Владимир Жаворонков.
«Без вакциналар керү белән бәйле кайбер өзеклекләрне билгеләп үтәбез, ләкин кешеләрдән моңа аңлап карауларын сорыйбыз, – дип өстәде ул. – Бүген яки иртәгә складларда вакцинаның чираттагы партиясе барлыкка килергә тиеш, 50 мең доза чамасы көтәбез. Шуннан соң аларны шунда ук вакцинация пунктларына китерәчәкләр, шул исәптән – метро станцияләре янындагы мобиль пунктларга һәм сәүдә үзәкләренә».
Атна башыннан Казанда Үзәк универсаль кибеттә вакцинация пункты эшли башлады, дип өстәде В.Жаворонков. Исегезгә төшерәбез, шулай ук мобиль пунктлар «Южный», «Мега» сәүдә-күңел ачу үзәкләрендә һәм «Парк Хаус» сәүдә-күңел ачу комплексында эшли.
«Антитәннәргә таянырга кирәкми – бу яклау күрсәткече түгел»
Республикада яшь кешеләр актив рәвештә коронавирустан прививкалар ясата, шул ук вакытта өлкән буынны вакцинацияләүнең тиешле дәрәҗәдә булмаган темплары борчуга сала, дип билгеләп үтте В.Жаворонков. «COVID-19 өлкән кешеләргә һәм хроник авырулары булганнарга бик җитди йогынты ясый, куркыныч кискенлекләр тудыра. Шуңа күрә өлкән буын беренче чиратта вакцинацияләнергә тиеш, – дип аңлатты спикер. – Хәзер без ишегалларында вакцинация пунктларын яңадан оештыру мөмкинлеген карыйбыз, чөнки анда өлкән яшьтәге кешеләр прививканы ешрак ясаткан».
Авырлы хатын-кызларга вакцина ясау бик мөһим, дип саный белгечләр. Йөкле хатын-кыз прививка ясатмаган очракта, аның якыннары һәм дусларының вакцинацияне ясатуына ирешергә кирәк, дип ассызыклый В.Жаворонков. Сүз уңаеннан, вакцинациядән соң барлыкка килгән иммунитет туасы балага тапшырыла.
Коронавирус белән авырган кешеләргә вакцинаны 6 айдан соң ясатыра кирәк. «Антитәннәргә таянырга кирәкми. Ярты ел үткән икән – вакцина ясатырга кирәк. Инде бүген үк беренче һәм икенче дулкынга эләккән һәм зур антитәннәре булган кешеләр дә кабат авырый. Антитәннәр – яклау маркеры түгел, – дип аңлата Сәламәтлек саклау идарәсе җитәкчесе. – Әгәр вакцина ясаткансыз икән, 6 айдан аны кабат ясатырга кирәк».
Уку йортлары хезмәткәрләрен мәҗбүри вакцинацияләү турында таләпләр юк
Бүген Татарстанда уку йортлары хезмәткәрләрен һәм укучыларны мәҗбүри вакцинацияләү турында карар юк. Әмма, коллективта COVID-19 кабынышы булган очракта, мондый күрсәтмәләр аерым мәктәпләргә һәм югары уку йортларына бирелергә мөмкин, дип хәбәр итте Л.Авдонина.
«Вәзгыять катлаулы, әмма идарә ителә торган, шуңа күрә бүген без мәҗбүри вакцинация кертергә планлаштырмыйбыз. Сүз һәр кешенең сәламәтлеген саклау турында бара, ул үзе карар кабул итәргә тиеш, – диде ул. – Без булган учакларны локальләштерү юлы белән барабыз. Әгәр хезмәт коллективында инфекция учагы барлыкка килгән икән, димәк, вакцинация турында күрсәтмә булачак».
Якын көннәрдә Татарстанда Корбан гаете булачак. Барлык чаралар санитар-эпидемиологик чараларны үтәп оештырылачак, дип ышандыра белгечләр.
«Без кешеләр агымын көйләргә, ябык биналарда аларның санын чикләргә, битлек режимын сакларга киңәш итәбез. Шулай ук без привика ясатмаган кешеләргә массакүләм чараларда катнашырга киңәш итмибез», – дип хәбәр итте Татарстан Республикасы буенча Кулланучылар хокукларын яклау һәм кеше иминлеге өлкәсендә күзәтчелек федераль хезмәте идарәсе җитәкчесе урынбасары.
Вакцинация турында сертификат булган очракта, чит илләрдән килгән татарстанлылар тест тапшырырга тиеш түгел
Башка чаралар белән беррәттән аэропортларда санитар-карантин контроль дә дәвам итә: бер атна эчендә белгечләр 43 һава судносын, шул исәптән чит илләрдән килгән 13 судноны карады, 5 мең 249 пассажирны һәм экипаж әгъзасын тикшерде. Алар арасында коронавирус шиге булган кешеләр ачыкланмады, дип хәбәр итте Л.Авдонина.
«Чит илдән килгән һәм кулларында COVID-19-га каршы вакцинация турында сертификаты булган Россия гражданнары өчен ПЦР-тесттапшырырга кирәкми, – дип искәртте ул. – Калганнар барысы да безнең илгә килгәннән соң, өч көн дәвамында тест тапшырырга һәм нәтиҗәләр алганчы үз-үзләрен изоляцияләү режимын сакларга тиеш».
Шулай ук укыгыз
-
05.05.2025, 20:05 -
05.05.2025, 15:23 -
05.05.2025, 13:54 -
05.05.2025, 10:41
