Татарстанда коткаручылар балыкчылар бозга чыга торган 84 урынны контрольдә тота

Автотранспортның бозга чыгуын булдырмас өчен 532 кешелек 119 җыелма патруль төркеме төзелде.

Фото: Денис Гордийко

(Казан шәһәре KZN.RU, 29-нчы декабрь). Татарстанда коткару хезмәтләре контролендә балыкчылар бозга чыга торган традицион 84 урын бар. Бу хакта бүген ТР Министрлар Кабинетында узган брифингта ТР гражданнар оборонасы эшләре һәм гадәттән тыш хәлләр министры - Россия Гадәттән тыш хәлләр министрлыгының ТР буенча Баш идарәсе башлыгы Рафис Хәбибуллин сөйләде.

«Безнең гражданнарның массакүләм мавыгуларының берсе - кышкы балыкчылык тармагы. Озакка сузылган бәйрәмнәр чорында балыкчыларның бозга массакүләм чыгуы көтелә. Бу көзге-кышкы чорда һава судноларын кулланып вакытлыча коткару постлары көче белән 5 кеше коткарылды», - дип хәбәр итте журналистларга Р.Хәбибуллин.

Аның сүзләренчә, төп бурыч - автотранспортның боз өстенә чыгуына юл куймау. Моның өчен кар белән керү юллары томалана, төрле каршылыклар ясала, постлар куела, аншлаглар урнаштырыла. «Әмма барыбер без җиңел уйлаучы автоһәвәскәрләрнең бозга чыкканда хәвеф-хәтәргә баруы белән очрашабыз. Мондый хокук бозуларны булдырмас өчен 532 кешелек муниципаль районнарның 119 җыелма патруль төркеме төзелде», - диде Россия Гадәттән тыш хәлләр министрлыгының Татарстан Республикасы буенча Баш идарәсе башлыгы.

Көзге-кышкы чорда патруль төркемнәре көче белән меңләгән тикшерү үткәрелде, меңнән артык әңгәмә үткәрелде, 697 аншлаг куелды, 64 кеше административ җаваплылыкка тартылды.

«Республикада салкын һава урнашты, боз нык. Республикада рәсми рәвештә автотранспортның имин хәрәкәте өчен дүрт боз кичүе булдырылды. Кече суднолар буенча дәүләт инспекциясе аларны раслады, контрольдә тотуны гамәлгә ашыра, әмма әлеге объектларның куркынычсызлыгы өчен эксплуатацияләү оешмасы җавап бирә», - дип билгеләде Р.Хәбибуллин.

Шулай ук укыгыз

Барлык яңалыклар