Татарстанга тагын 36 мең доза вакцина килде

Гриппка каршы прививканы табиблар COVID-19 вакцинациясеннән соң бер ай узгач ясарга киңәш итә.

Фото: Марат Мугинов

(Казан шәһәре KZN.RU, 13-нче август, Ксения Швецова). Татарстанда бүгенге көндә коронавирус инфекциясеннән 30%-ка якын кеше вакцинацияләнде. Вакцина республикага даими рәвештә килә – бүген Татарстанга 36 мең дозага якын «Спутник V» һәм «Спутник Лайт» вакцинасы кайтарылды, дип хәбәр итте «Татар-информ» мәгълүмат агентлыгында узган матбугат конференциясендә ТР Сәламәтлек саклау министрлыгының иммунопрофилактика буенча баш эпидемиологы Дмитрий Лопушов.

20 мең татарстанлы икенче прививкага килмәде

Хәзерге вакытта Татарстанда коронавирустан 910 мең 430 кеше вакцина ясаган, шуларның 719 мең 707-се икенче прививка ясаткан. «Тулаем алганда вакцинация темплары теләгәнчә югары түгел, бигрәк тә өлкән буын арасында. Бүгенге көндә 60 яшьтән өлкәнрәк 216 мең 226 кеше вакциналаштырылган, бу якынча 23% тәшкил итә», – дип хәбәр итте Дмитрий Лопушов.

Вакциацияне башлаган 20 меңгә якын кеше икенче прививкага килмәде. Сүз уңаеннан, әгәр элегрәк ике прививканы да бер медицина учреждениесендә яки прививка пунктында гына эшләп булса, хәзер вакцинациянең икенче этабын Россиянең теләсә кайсы башка шәһәрендә узарга мөмкин. Белгечләр фикеренчә, бу яңалык вакцинаның ике компонентын да ясаткан татарстанлыларның санын арттырырга мөмкинлек бирәчәк.

Кабаттан республиканың 2013 кешесе вакцина ясаткан. Исегезгә төшерәбез, медиклар ревакинация узарга моннан алты ай элек прививка ясатканнарга киңәш итә.

Татарстанда чит ил студентларына һәм гражданлыгы булмаган кешеләргә вакцина ясый башлаячаклар

Якын арада Татарстанда чит ил гражданнарына һәм гражданлыгы булмаган кешеләргә вакцина ясый башлаячаклар. Алар өчен прививка түләүле булачак, дип билгеләде Дмитрий Лопушов. Хәзер, аның сүзләренчә, бу хезмәт күрсәтү мөмкин булган медицина учреждениеләре исемлеге билгеләнә. «Атна ахырында бер компонентлы «Спутник Лайт» вакцинасының якынча 21 мең дозасы кайтарылачак, һәм без шунда ук вакцинациягә керешәчәкбез», – дип өстәде баш эпидемиолог.

Бүгенге көндә республикада халыкның 30%-ка якыны вакциналашкан, бу беренчел планнан ике тапкыр кимрәк, дип өстәде Татарстан Республикасы буенча Россия кулланучылар хокукларын яклау һәм кеше иминлеге өлкәләрендә күзәтчелек федераль хезмәтенең ТР буенча идарәсе җитәкчесе урынбасары Любовь Авдонина.

Пандемия башланганнан бирле Татарстанда Британия штаммы белән авыруның 32 очрагы һәм Һиндстан штаммы белән авыруның 83 очрагы теркәлгән, дип хәбәр итте ул. «Вирусның яңа штаммнары без вакцина ясатмаганга һәм вирусны кешедән кешегә тапшыру чылбырын өзмәү аркасында барлыкка килә. Без никадәр иртәрәк тотынсак, вирусның үзгәрүен шулкадәр иртәрәк туктатачакбыз», – дип ассызыклады ул.

Сентябрьдә Татарстанда гриппка каршы прививка кампаниясе старт ала. Бу вакытка кадәр белгечләр коронавирустан мөмкин кадәр күбрәк республика халкын прививка ясатырга планлаштыралар. Россия кулланучылар хокукларын яклау һәм кеше иминлеге өлкәләрендә күзәтчелек федераль хезмәтенең ТР буенча идарәсе җитәкчесе урынбасары аңлатканча, грипптан СОVID-19 вакцинациясеннән соң бер ай узгач, прививка ясарга була.

Искәртеп узабыз, Татарстанда пандемия башланганнан бирле COVID-19 авыруының 24 мең 583 очрагы теркәлгән, күрсәткеч 100 мең кешегә 630-ны тәшкил итә. Медицина күзәтүе астында коронавируста шикләнелгән 3529 кеше кала.

Шулай ук укыгыз

Барлык яңалыклар