Татарстан башкаласында Казан Мәрьям Ана иконасы хөрмәтенә тәре йөреше узачак

Татарстан башкаласында Казан Мәрьям Ана иконасы хөрмәтенә тәре йөреше узачак

<p> Татарстан башкаласында 21 июльдә үзәк урамнар буйлап транспорт хәрәкәтен чикләячәкләр. Бу Казан Мәрьям Ана иконасы барлыкка килү уңаеннан тәре йөреше уздыру белән бәйле, дип хәбәр итте эшлекле дүшәмбедә Башкарма комитетның иҗтимагый оешмалар белән элемтә бүлеге җитәкчесе Илгиз Сарманов. </p> <p> «Бер атнадан Казан Изге Ана иконасы бәйрәме билгеләп үтеләчәк. Икона Россия тарихында зур роль уйнаган һәм православие динендәгеләрдә иң хөрмәтле образларның берсе булып тора. Быел Богородица монастыре комплексының сизелерлек үзгәрүе сөендерә – нибары бер ел эчендә Никола Тульский храмы үзенең элеккеге кыяфәтен алды. Аны реставрацияләү тулы көчкә бара», – дип билгеләп үтте шәһәр Башкарма комитеты җитәкчесе Рөстәм Гафаров. </p> <p> Бәйрәм чарасы 7:30 да Благовещение соборында тантаналы гыйбадәт кылудан башлана. Аннары дин тотучылар Казан Кремле тирәли Батурин – Карл Маркс – Миславский урамнары буйлап Богородицкий монастырена кадәр тәре йөреше белән барачаклар. </p> <p> Шуңа бәйле рәвештә, 21 июль көнне 7:00 сәгатьтән әлеге маршрут буенча транспорт хәрәкәтен туктатачаклар. Шулай ук 20 июльдә 20:00 сәгатьтән Миславский урамында автомобильләр парковкасын чикләячәкләр. Гафаров, эш атнасы башлануын исәпкә алып, Вахитов районы администрациясенә ЮХИДИ һәм эчке эшләр идарәсе белән берлектә эшкә баручы халык өчен альтернатив маршрутлар эшләргә, шулай ук тәре йөреше үтеп китүгә үк транспорт хәрәкәтен ачарга кушты. </p> <p> Шул ук көнне «Елмай» балалар паркында җырчы Ольга Кормухина чыгыш ясаячак. Керү ирекле, дип йомгаклады Илгиз Сарманов. </p>

2025-07-14T11:17:26+0300