Казанның Иске Татар бистәсендә 15 метрлы чыршысы һәм дүрт боздан ясалган тавы булган чыршы шәһәрчеге ачылды

Бәйрәм мәйданчыгында Яңа ел утарлары эшли башлады, анда сувенирлар сатып алырга, чәй һәм глинтвейн белән җылынырга мөмкин.

(Казан шәһәре KZN.RU, 27-нче декабрь, Алена Мирошниченко). Бүген Казанның Иске Татар бистәсендә «Иске Татар бистәсендә Яңа ел көннәре» («Новогодние дни в Старо-Татарской слободе») чыршы шәһәрчеге ачылды. Татарстан башкаласы халкы һәм кунаклары өчен 15,5 метр биеклектәге Яңа ел чыршысы, аңа ылыслы аркалардан тоннель һәм боздан ясалган дүрт тау (бер зур һәм өч балалар өчен) урнаштырдылар. Чыршы шәһәрчеген ачуда «Иске шәһәр» территориясе префекты Роберт Гарипов, Мәдәният идарәсе башлыгы Азат Абзалов, Туризмны үстерү комитеты директоры Дарья Санникова катнашты. Алар халыкны якынлашып килүче бәйрәм белән котладылар, казанлыларга киләсе Яңа елда бәхет теләделәр.

Бәйрәм мәйданчыгында Яңа ел утарлары эшли башлады, анда сувенирлар сатып алырга, чәй һәм глинтвейн белән җылынырга, шулай ук традицион татар сыйлары, мәсәлән, кияү пилмәннәре белән сыйланырга мөмкин.

Шәһәрлеләр һәм Казан кунаклары өчен Кыш Бабай, Кар кызы һәм башка әкияти персонажлар катнашында бәйрәм программасы әзерләнгән иде. Сәхнәдә шәһәр модасы театры, хореография һәм вокал ансамбльләр артистлары чыгыш ясады. «Яңа ел якынлаша, һәм бәйрәм алдыннан яхшы кәеф булуын телибез. Яңа чыршы шәһәрчегендә бик матур, гыйнвар бәйрәмнәре вакытында без монда тагын бер тапкыр килербез дип уйлыйм», – дип белдерде Казанда яшәүче Алия Зарипова. Бәйрәмгә ул ире һәм ике баласы белән килгән.

Чыршы шәһәрчеге Яңа ел каникуллары дәвамында 10.00 сәгатьтән 20.00 сәгатькә кадәр эшләячәк.