Гомумроссия гражданнарны кабул итү көнендә Казан Башкарма комитетына 43 кеше мөрәҗәгать итте

Белгечләр казанлыларга һәр аерым проблеманы нинди тәртиптә хәл итәргә мөмкин булуын аңлатты.

(Казан шәһәре KZN.RU, 13-нче декабрь). 12-нче декабрьдә узган Гомумроссия гражданнарны кабул итү көнендә Казанның җирле үзидарә органнарына ярдәм сорап 43 кеше мөрәҗәгать итте.

Татарстан башкаласында кабул итүне Казан шәһәр Думасының, шәһәр Башкарма комитетының структур бүлекчәләре, сайлау комиссиясе, Контроль-хисап палатасы, район администрацияләренең вәкаләтле затлары алып барды. Казанлылар өчен 12.00-дән 20.00-гә кадәр алты кабул итү пункты ачылды. Кабул итү алдан язылмыйча гына башкарылды.

Шәһәр халкы мөрәҗәгать иткән иң популяр сораулар - торак шартларын яхшырту, территорияләрне төзекләндерү, күп фатирлы йортларның подъездларында капиталь ремонт мәсьәләләре, дип хәбәр иттеләр Эш башкару идарәсендә.

Барлык сораулар буенча аңлатмалар бирелде: белгечләр казанлыларга һәр аерым проблеманы нинди тәртиптә хәл итәргә мөмкин булуын аңлатты.

Дәүләт хакимияте һәм җирле үзидарә органнарында гражданнарны кабул итүнең гомумроссия көне РФ Президенты кушуы буенча оештырылды.

Исегезгә төшерәбез, Башкарма комитетның 2009 елның 19-нчы мартыннан чыккан 845 номерлы карары нигезендә, гражданнарны кабул итү атна саен үткәрелә. Моннан тыш, порталда интернет-кабул итү бүлеге эшли, Казан халкы бирегә тәүлек буе мөрәҗәгать итә ала.

2003 елның 6-нчы октябреннән чыккан 131-нче номерлы «Россия Федерациясендә җирле үзидарәне оештыруның гомуми принциплары турында»гы федераль законның 15-нче маддәсе нигезендә, Казанның җирле үзидарә органнары компетенциясенә җирле әһәмияттәге мәсьәләләрне хәл итү керә.

Шулай ук укыгыз

Барлык яңалыклар