Яңа ел төнендә "Казан" гаилә үзәге янындагы шәһәрнең төп чыршысына 18 мең кеше килгән

"Черек күл" паркында шугалакта 10 мең казанлы һәм шәһәр кунаклары булган.

(Казан шәһәре KZN.RU, 1-нче гыйнвар, Ксения Швецова). Яңа ел төнендә "Казан" гаилә үзәге янындагы мәйданчыкта 18 меңгә якын кеше булган. Казанлылар һәм шәһәр кунаклары өчен бәйрәм программасы әзерләнгән иде, ул 22.00 сәгатьтән 2.00 сәгатькә кадәр дәвам итте.

2018 елда FIFA Җанатарлар фестивале узган мәйданчык кунакларны Казан Кремленә искиткеч матур күренеш белән генә түгел, ә бай мәдәни программа белән дә каршы алды - өлкәннәр һәм балалар музыка коллективлары, диджей, уеннар, биюләр, аттракционнар һәм боз шәһәрчегендә кышкы күңел ачулар көтте.

Шәһәрлеләр үзләренең хис-кичерешләре, планнары, хыяллары белән интервьюда бүлештеләр, алар сәхнәдә урнаштырылган зур экранда трансляцияләнде. Казанның төп мәйданчыгында яңа елны ничек бәйрәм итүләре турында бөтен илгә федераль телеканалларның берсеннән килгән төшерү төркеме сөйләде.

Шундый ук күңелле яңа, 2019 елны каршылау бәйрәме "Черек күл" паркында узды, анда быел тагын бер шәһәр чыршысы һәм шугалак ачылган. Яңа ел төнендә биредә Казанның 10 меңгә якын кешесе һәм кунагы булган. Аларның 2019 елга бәйрәм белән котлаулары һәм теләкләре зур экранда трансляцияләнде. Моннан тыш, паркта, Казан янындагы мәйданчыкта кебек үк, Татарстан Президенты һәм Россия Президентының видео чыгышлары трансляцияләнде. Яңа ел төнендә "Черек күлдә" музыка, уеннар һәм кышкы уеннар белән бай программа әзерләнгән иде.

Яңа ел каникуллары көннәрендә шәһәр халкын бик күп кызыклы вакыйгалар һәм чаралар көтә, тулы мәдәни афиша белән KZN.RU порталының махсус бүлегендә танышырга мөмкин.

Шулай ук укыгыз

Барлык яңалыклар