ТР Милли музеенда Юрий Гагаринның Казанга килүенең архив фотосурәтләрен тәкъдим итәчәкләр

Күргәзмә ачылышында килүчеләрне сюрприз көтә – Халыкара космик станция хезмәткәрләреннән сәламләү.

Фото: Марат Мугинов

(Казан шәһәре KZN.RU, 12-нче апрель). Бүген Татарстан Республикасы Милли музеенда кешенең космоска беренче очуының 60 еллыгына багышланган «Галәм бусагасында» күргәзмәсе ачылачак. Ачылышта килүчеләрне сюрприз – Халыкара космик станция хезмәткәрләреннән сәламләү көтә.

«Галәм бусагасында» – элегрәк космос темасына фондлардан предметларны мондый күләмдә чыгармаган музейның зур проекты. Килүчеләр Юрий Гагаринның 1967 елда Казанга килүенә багышланган фоторәсемнәр, плакатлар, фотооткрыткалар, почта карточкалары, значоклар, маркалар күрәчәк, алар СССРда төрле елларда чыгарылган. Шәһәр халкы һәм кунаклары астрономиянең борынгы Мисырдан башлап үсеш юлын күзәтә, Татарстанның һәм аның предприятиеләренең космосны буйсындыруга керткән өлешен бәяли, Казанда Сергей Королев һәм Валентин Глушко эшчәнлеге белән таныша һәм хәтта Россия космонавты Николай Бударинның күнегүләр костюмын да күрә алачак.

ТР Милли музеена күргәзмә оештыруда ярдәм итүне С.М.Лисенков исемендәге Әлки тарих-туган якны өйрәнү музее, Казан федераль университетының астрономия мәктәбе, «Завод Элекон» АҖ, «Электроприбор» ААҖ күрсәтте.

Күргәзмәне ачу 14.00 сәгатьтә башлана, музейга керү билетлар буенча. Ул 2021 елның 1-нче июненә кадәр эшләячәк, дип хәбәр итә музейның матбугат хезмәте.

Шулай ук укыгыз

Барлык яңалыклар