ТР Милли музеенда Финат Нәбиуллинның «Гасырдан гасырга» картиналар күргәзмәсе ачылачак

Экспозиция татар халкының мәдәниятенә, анималистик һәм пейзаж сәнгатенә багышланган берничә сериядән тора.

Фото: Фото: Казан шәһәре KZN.RU

(Казан шәһәре KZN.RU, 10-нчы февраль). 11-нче февральдә ТР Милли музеенда рәссам Финат Нәбиуллинның «Гасырдан гасырга» картиналар күргәзмәсе ачылачак. Экспозиция татар халкының мәдәниятенә, анималистик һәм пейзаж сәнгатенә багышланган берничә сериядән тора. Күргәзмә рәссамның 60 еллыгына багышланган.

Килүчеләр күргәзмә өчен махсус язылган һәм моңарчы беркайда да күрсәтелмәгән эшләрне карый ала: «Сак Сок», «Казан сөлгесе», «Татар бистәсе манаралары», «Сабантуй», «Аргамаклар очрашуы», «Татар токымлы атлар», «Иделгә кичке сәфәр». Тарихи сериядә Идел Болгарына һәм Казан ханлыгына багышланган картиналар тәкъдим ителгән.

Рәссамның кайбер эшләре Франциядә 2003 елда Парижда, Россия көннәре кысаларында, Венсен ипподромында күрсәтү өчен сайлап алынган, дип хәбәр итә ТР Милли музееның матбугат хезмәте.

Финат Нәбиуллин – хезмәтләре Казан, Уфа, Омск, Пенза музейларында, Россиядә һәм чит илләрдә (Германия, Франция, Чехия, Голландия, АКШ, Төркия, Казахстан, Үзбәкстан, Беларусь) шәхси коллекцияләрдә саклана торган күпсанлы күргәзмәләрдә катнашучы. Рәссам Россия Рәссамнар берлегенең «Ватан мәдәниятенә өлеш керткән өчен» бронза медале, төрле ведомстволарның мактау грамоталары белән бүләкләнгән. Финат Нәбиуллин соңгы елларда пейзаж рәсем сәнгатендә мавыгып эшли. Аның иҗатында Татарстанның табигате аерым урын алып тора.

Күргәзмә 15.00 сәгатьтә ачылачак. Шәһәр халкы һәм кунаклары аны 26-нчы февральгә кадәр карый алачак.

Шулай ук укыгыз

Барлык яңалыклар