ТР Милли музеенда инвалидлар өчен «Игелек сәнгате» дигән бушлай җайлаштырылган программа әзерләделәр

1-10-нчы декабрь көннәрендә оригами буенча остаханәләр, бард белән танышу, робот-гид белән экскурсия һәм башка чаралар узачак.

Фото: Денис Гордийко

(Казан шәһәре KZN.RU 25-нче ноябрь). 3-нче декабрьгә туры килә торган Халыкара инвалидлар көне уңаеннан Татарстан Республикасы Милли музеенда «Игелек сәнгате» дип аталган махсус җайлаштырылган мәдәни программа әзерләнгән.

Казанлылар музей дәресләрендә, экскурсияләрдә, квестларда, Татарстан тарихы буенча лекцияләрдә, оригами, каллиграфия, кул эшләре буенча остаханәләрдә катнаша ала. Тифло- һәм сурдокомментарийлар белән кино күрсәтү планлаштырылган.

Казанның танылган барды Александр Тарвердян «Авторлык җыры» дигән лекция әзерләде. Тагын бер музыкаль очрашу «Музыкаль пәнҗешәмбе» акциясе кысаларында узачак – Н.Г.Җиһанов исемендәге Казан дәүләт консерваториясенең урта махсус музыка мәктәбе укучылары классик көйләрне башкарачак.

Балалар һәм өлкәннәр өчен чаралар Кремль урамы, 2 адресы буенча урнашкан төп бинада гына түгел, ә башка мәйданчыкларда да узачак. Мәсәлән, Габдулла Тукай әдәби музеенда робот-гид белән экскурсия, Татар китабы йортында Брайль шрифты буенча сәнгатьчә укучылар конкурсы, Е.А.Боратынский музеенда тавышлар һәм ароматлар ярдәмендә төзелгән экскурсияләр узачак.

Очрашуларга керү бушлай. Кулланучылар хокукларын яклау һәм кеше иминлеге өлкәсендә күзәтчелек федераль хезмәтенең COVID-19 таралуга каршы күрсәтмәләрен үтәү сорала. Чараларның тулы программасы, музей адреслары һәм белешмәләр өчен телефоннар Татарстан Республикасы Милли музее сайтында урнаштырылган.

Шулай ук укыгыз

Барлык яңалыклар