Киров районында светофорның кызыл сигналына юлны чыккан җәяүлене бәрдергәннәр

Казанда тәүлек эчендә 92 юл-транспорт һәлакәте булган

Фото: Денис Гордийко

(Казан шәһәре KZN.RU, 25 нче август). Кичә Залесная һәм Осиново урамнары киселешендә 18 яшьлек шофер җәяүлене бәрдергән. Беренчел мәгълүматлар буенча, ул светофорның кызыл сигналына юлны чыккан. 35 яшьлек зыян күрүче төрле дәрәҗәдәге җәрәхәтләр алган, аңа медицина ярдәме күрсәтелгән.

Узган тәүлектә ТР башкаласында барлыгы 92 юл-транспорт һәлакәте теркәлгән. 600 шофер һәм 185 җәяүле административ җаваплылыкка тартылган: сигез автомобильче исереклек килеш автомобиль белән идарә иткән өчен тоткарланган, 12 автомобильче балаларны йөртү кагыйдәләрен бозган, тагын 83 е – куркынычсызлык каешларын куллану кагыйдәләрен, 70 шофер җәяүлеләргә юл бирмәгән.

Исегезгә төшерәбез, быелның җиде аенда Казанда 16 яшькә кадәрге балалар катнашында 81 юл-транспорт һәлакәте булган. Аларның 87 се төрле дәрәҗәдәге җәрәхәтләр алган.

Балалар катнашындагы юл-транспорт һәлакәтләре саны август-сентябрь айларында арта, яшүсмерләр озын каникуллардан соң юлда куркынычсызлык күнекмәләрен оныталар һәм аларга транспорт мохитенә өстәмә адаптация таләп ителә. Мәсәлән, узган елның август-сентябрь айларында 19 юл-транспорт һәлакәте теркәлгән, аларда 19 бала зыян күргән. Мондый вакыйгаларның өлеше ел дәвамында теркәлгән күрсәткечләрнең гомуми санының 23% ын тәшкил итә.

10 нчы сентябрьгә кадәр шәһәрдә «Игътибар, балалар!» дигән профилактик чара уза, ул ата-аналар җыелышларын, юл хәрәкәте кагыйдәләрен бозуны кисәтү һәм яктылык кайтаручы элементларны популярлаштыру буенча акцияләрне үз эченә ала, дип хәбәр иттеләр Россия Эчке эшләр министрлыгының Казан буенча ЮХИДИ бүлегендә.

Шулай ук укыгыз

Барлык яңалыклар