КФУда беренче тапкыр коронавирус штаммнарына тест сынаулары узачак

Яңа тест COVID-19 авыруын кузгатучы – дельта яки омикрон штаммнарын ачыклый.

Фото: Денис Гордийко

(Казан шәһәре KZN.RU, 28 нче гыйнвар). Казанда беренче тапкыр омикрон һәм дельта коронавирус штаммына сынаулар үткәреләчәк. Медицина эшләнмәсенең теркәү таныклыгы бар.

«Яңа тест COVID-19 авыруын кузгатучы штаммның кайсысы булуын күрсәтә: дельтамы (һинд штаммы) яки омикронмы (беренче тапкыр Көньяк Африкада табылган). Дельта штаммы омикроннан мутацияләр саны буенча аерыла. Омикронның мутацияләре дельта белән чагыштырганда бик күп (30-дан артык). Тест бу уникаль мутацияләрне исәпкә ала, һәм әгәр алар үрнәктә булса, уңай сигнал булачак. Әгәр юк икән, сигнал тискәре булачак. Дифференциаль диагностика килеп чыга. Теге яки бу сигнал булуга карап, без теге яки бу коронавирус штаммының булуын раслыйбыз. Нәтиҗәдә, без кеше авырыймы, юкмы, дельта беләнме яки омикрон беләнме икәнен әйтә алабыз, – дип сөйләде Прецизион һәм регенератив медицина фәнни-клиник үзәге директоры, ТР Фәннәр Академиясенең әгъза-корреспонденты Альберт Ризванов.

Профессор сүзләренә караганда, мутация нәтиҗәсендә омикрон йогышлырак. «Омикронның репродукция индексы сигезгә тигез, ә дельтаныкы – дүрткә. Омикрон-штамм белән авыручы кеше уртача сигез кешене зарарлый ала», – диде А.Ризванов.

Моннан тыш, омикрон белән авырганда авыру җиңелрәк уза, бигрәк тә бу вакцинацияләнгән һәм элегрәк авырган кешеләргә кагыла. Дельта азрак йогышлы штамм булса да, авыруны тагын да авыр формада китереп чыгара. «Кешенең нинди штамм белән зарарланганын белеп, аның тирә-юньдәгеләр өчен ни дәрәҗәдә йогышлы булуын әйтергә мөмкин», –дип билгеләп үтте А.Ризванов.

Хәзер тестларны сынау клиник практикада үткәрелә. 2 нче февральдән бу хезмәтне физик һәм юридик затларга да күрсәтү планлаштырыла, дип хәбәр итә КФУ матбугат хезмәте.

Шулай ук укыгыз

Барлык яңалыклар