Ленин исемендәге мәдәни-ял итү комплексында сукыр егетнең Эльбруска күтәрелүе турында фильм күрсәтәчәкләр

Тамаша тифлокомментарийлар һәм субтитрлар белән озатылачак.

Фото: Денис Гордийко

(Казан шәһәре KZN.RU, 20 нче октябрь). 26 нчы октябрьдә Татарстан башкаласында «Вслепую на Эльбрус» фильмының инклюзив куелышы булачак. Кинокартина күзләре күрми торган егетнең тауга менүенең уникаль тарихы турында сөйли.

Кино куелышында картина авторы, «Караңгыдагы тормыш» инклюзив медиапроектлары ассоциациясенә нигез салучы, күзләре күрмәүче рекордчы Иван Ерхов катнашачак. «Бик көчле, тормышчан һәм мотивацияләүче картина барлыкка килде, бу безгә бөтен чикләр дә башыбызда гына булуын раслый. Тормышыгызда нәрсә генә булмасын, кәефегезне төшермәгез һәм бирешмәгез. Мин шәхси мисалымда тормышта барысының да чынга аша алуын күрсәттем. Иң мөһиме – бернигә дә карамастан хәрәкәттә булырга!» – дип ул ышана.

Фильм тифлокомментарийлар һәм субтитрлар белән озатылачак. Тамашачылар кинокартинаны төшерүчеләргә үз сорауларын бирә алачак.

Әлеге кино куелышы «Кино вакыты» дирекциясе һәм Республика сукырлар һәм начар күрүчеләр китапханәсе тарафыннан Копылов ур., 2а адресы буенча урнашкан В.И.Ленин исемендәге мәдәни-ял итү компексында үткәрелә. Чара 19:00 дә башлана. «Вслепую на Эльбрус» проекты Президентның Мәдәни инициативалар фонды ярдәмендә тормышка ашырыла торган «Алтын тәлинкә» кинематография өлкәсендәге төбәкара премия каталогында тәкъдим ителә.

Фильм 16 яшьтән узган тамашачыларга адреслана. Катнашу өчен теркәлү узарга кирәк. Билетларны сылтама буенча броньларга була, дип хәбәр итә «Кино вакыты» дирекциясе матбугат хезмәте.

Шулай ук укыгыз

Барлык яңалыклар