Казанның «Смена» спорт мәктәбендә флорбол буенча бүлек ачылды

Дәресләргә 7 яшьтән балалар языла ала.

Фото: «Ирбис» профессиональ флорбол клубы

(Казан шәһәре KZN.RU, 27 нче сентябрь, Юлия Летникова). Казанның «Смена» спорт мәктәбендә флорбол буенча бүлек ачылды. Секциядә 7 яшьтән алып 80 бала шөгыльләнәчәк, шул ук вакытта уку өчен барлык урыннарның яртысыннан артыгы инде алынган. Бу хакта «Татар-информ» мәгълүмат агентлыгында узган матбугат конференциясендә Казанның Физик культура һәм спорт комитеты рәисе Альберт Салихов сөйләде.

Флорбол Татарстанда 2019 елдан бирле үсә башлады. «Моннан 3-5 ел элек татарстанлылар флорбол турында бик аз белә иде, әмма вакыт белән вәзгыять үзгәрде», – дип билгеләп үтте Альберт Салихов. Аның сүзләренә караганда, берничә ел эчендә республикада Флорбол федерациясе, «Ирбис» профессиональ командасы оештырылган, флорбол буенча Казан беренчелеге уздырыла, шулай ук 40 мәгариф учреждениесе ярыша торган мәктәп лигасы оештырылган.

«Бүгенге көндә флорбол белән республиканың 500 дән артык кешесе шөгыльләнә», – дип билгеләп үтте Казанның Физик культура һәм спорт комитеты рәисе. Спортның бу төрен үстерү үз профессиональ флорболчыларын тәрбияләү кирәклеге турында сөйли, дип аңлатты ул. Флорболның балалар секциясе турындагы мәгълүматны спорт мәктәбе телефоны буенча ачыкларга була: +7(843)237-52-62.

Искәртеп узабыз, «Ирбис» профессиональ флорбол клубы узган ел оештырылган иде. Быелгы сезонда спортчыларга Россия чемпионатының югары лигасында чыгыш ясарга туры киләчәк. Казан флорболчылары күп тапкырлар ил чемпионы булган Архангельскиның «Помор» командасы һәм узган сезонның җиңүчесе – «Сибирь» командасы белән очрашачак.

Шулай ук укыгыз

Барлык яңалыклар