Казанда 2022 елда узачак волейбол буенча дөнья чемпионатына кадәр кире санау сәгатьләрен эшләтеп җибәрделәр

Бер елдан соң Татарстан башкаласында һәм тагын тугыз Россия шәһәрендә көчле командалар катнашында матчлар узачак.

Фото: ТР Дәүләт Советы

(Казан шәһәре KZN.RU, 26-нчы август). 2022 елгы волейбол буенча дөнья чемпионатына кадәр вакытны кире санау сәгатьләре бүген, турнир стартына кадәр нәкъ бер ел кала, Казанның Кремль яр буенда эшләтеп җибәрелде. Символик төймәгә ТР Дәүләт Советы рәисе, ТР Волейбол федерациясе президенты Фәрит Мөхәммәтшин, РФ Дәүләт Думасы депутаты Ольга Павлова, ТР спорт министры урынбасары Алмаз Мингулов, «Зенит-Казан» волейбол клубы президенты Рәфкать Кантюков, волейбол буенча Россия Олимпия командасы әгъзасы Максим Михайлов, Махсус Олимпиада атлет-волейболчылары Алинә Абдрахманова һәм Роман Ошевалов басты.

Тантанада шулай ук ТР Премьер-министры урынбасары Ләйлә Фазлыева, Казан муниципаль берәмлеге башлыгы урынбасары Евгения Лодвигова һәм башкалар катнашты.

Казан берничә тапкыр иң югары дәрәҗәдәге спорт вакыйгаларын кабул итте, дип искәртте Ф.Мөхәммәтшин. «Волейбол буенча дөнья чемпионаты Татарстан башкаласының иң җаваплы һәм әһәмиятле халыкара чараларны кабул итәргә һәм уздырырга сәләтле шәһәр буларак статусын тагын да ныграк раслаячак», – дип ышана ул.

Токиода узган җәйге Олимпия уеннарында Россия волейболчылары көмеш медальләр яулады, дип искәртте ТР Дәүләт Советы рәисе. «Мондый җиңүләр – безнең горурлыгыбыз, дөрес сайланган юлда илһам һәм ышаныч нигезе, – дип җиткерә Ф.Мөхәммәтшинның сүзләрен ТР Дәүләт Советы матбугат хезмәте. – Без спортның бу төрен үстерүне дәвам итәбез: югары класслы волейболчылар әзерлибез, мәктәп укучылары, студентлар арасында волейболны популярлаштырабыз».

Исегезгә төшерәбез, волейбол буенча дөнья чемпионаты 2022 елның август-сентябрендә ун Россия шәһәрендә узачак: Мәскәү, Санкт-Петербург, Калининград, Ярославль, Казан, Уфа, Екатеринбург, Новосибирск, Кемерово, Красноярск.

Шулай ук укыгыз

Барлык яңалыклар