Казанда рәсмиләштерелгән гаиләләр саны артты

Гаиләләрен күбрәк 25 яшьтән 34 яшькә кадәрге ир-атлар һәм хатын-кызлар рәсмиләштергән.

Фото: Марат Мугинов

(Казан шәһәре KZN.RU, 17-нче гыйнвар, Алинә Бережная). 2021 елда Казанда 11 мең 461 пар гаиләләрен рәсмиләштергән, бу 2020 елга караганда 37%ка күбрәк. Гаилә берлегенә күбрәк 25 яшьтән 34 яшькә кадәрге ир-атлар һәм хатын-кызлар кергән. Бу хакта бүген шәһәр Башкарма комитетында узган эшлекле дүшәмбедә Гражданнар хәле актларын теркәү идарәсе башлыгы Римма Миңнуллина хәбәр итте.

Аның сүзләренә караганда, 2021 елның 14-нче декабрендә иң өлкән яшьтәге пар үзенең гаиләсен рәсмиләштергән: кияүгә 79 яшь, кәләшкә 76 яшь булган.

Гадәттәгечә Казанда гаилә тормышы юбилярларын хөрмәтлиләр. «Мәхәббәт һәм тугрылык өчен» медальләрен тапшыру икенче ел рәттән эпидемиологик вәзгыять аркасында ябык форматта уздырыла – бүләкләнүчеләрнең өйләренә барып котлап кайталар. Шул рәвешле, Мэрның котлау адресы һәм акчалата бүләкне 1145 гаилә алган. 70 еллык гаилә тормышы белән 4 гаилә, 60 еллык юбилей, бриллиант туй белән - 191 гаилә, 50 еллык гаилә юбилее, алтын туй белән 950 гаиләне котладылар.

Шул ук вакытта аерылышулар саны 18%ка арткан – 2021 елда никахны өзү турында 5 мең 344 акт теркәлгән. «Аерылышулар саны артуны без 2020 елда күрсәтелгән хезмәтләрнең кайбер төрләре буенча булган чикләүләргә бәйлибез, шул исәптән никахны өзү буенча да», - дип аңлатты Гражданнар хәле актларын теркәү идарәсе башлыгы. Бу статистикага карамастан, Казанда, миллион халкы булган башка шәһәрләр белән чагыштырганда, никахлар һәм аерылышулар нисбәте буенча иң яхшы күрсәткеч саклана.