Казанда "Халык Кыш бабае" бәйгесендә катнашу өчен гаризалар кабул итү башланды

Җиңүчеләрне "Казан" гаилә үзәге янындагы мәйданда шәһәрнең төп чыршысын ачу тантанасында билгеләячәкләр.

(Казан шәһәре KZN.RU, 10-нчы декабрь, Алена Мирошниченко). Бүген Казанда "Халык Кыш бабае" бәйгесендә катнашу өчен гаризалар кабул ителә башлады. Кызыклы яңа ел ярышлары турында тулырак мәгълүмат белән шәһәрнең Башкарма комитетында узган атна саен үҗә торган эшлекле дүшәмбе киңәшмәсендә Мәдәният идарәсе җитәкчесе Азат Абзалов сөйләде.

Конкурста катнашу өчен барлык теләүчеләр чакырыла. Ике кешедән торган төркемнәргә үзләренең яңа ел программаларын костюмнарда тәкъдим итәргә кирәк. Гаризалар dedmoroz_kzn@bk.ru электрон почта аша кабул ителә.

15 декабрьдә гаризалар сайлап алу узган халык Кыш бабайлары Казан сәүдә үзәкләренең берсендә кыска интерактив программаларын тәкъдим итәчәк, анда аларны профессиональ жюри бәяләячәк. 20-23 декабрьдә әлеге программалар, яңа ел сувенирлары уйнатып, шәһәр урамнарында, тукталыш павильоннары янында һәм торак массивларда тәкъдим ителәчәк. "Җиңүчене сайлаганда жюри бәясе һәм конкурсның рәсми Instagram-аккаунтындf (@Narodnydedmoroz) онлайн-тавыш бирү барышында җыйган тавышлар саны исәпкә алыначак. Бәйгегә йомгак ясау һәм җиңүчеләрне бүләкләү яңа ел алдыннан "Казан" гаилә үзәге янындагы мәйданда шәһәрнең төп чыршысын ачу тантанасында булачак", - дип хәбәр итте А.Абзалов.

Конкурста катнашу буенча тулырак мәгълүмат, шулай ук Халык Кыш бабае командаларының чыгышлары графигы белән порталда һәм 571-84-81 телефоны буенча танышырга мөмкин.

Шуны да билгеләп үтәргә кирәк, яңа ел марафоны Казанда 30 ноябрьдә, Татарстан башкаласына Бөтенроссия Кыш бабае визиты белән старт алды. Ул "Игелекле дулкын" Бөтенроссия мәдәни-хәйрия фестивале концертында катнашучыларны котлады. Кышның беренче көнендә ул Урицкий паркында балалар һәм аларның әти-әниләре өчен матур бәйрәм оештырды, кышкы сезонны скандинавия йөреше буенча Казанның "тормышны яратучылары" белән бергә ачты, Республика клиник хастаханәсенең нейрохирургия бүлегенең яшь пациентлары, балалар приютында тәрбияләнүчеләр һәм мохтаҗ гаиләләр белән очрашты. Моннан тыш, яңа ел тылсымчысы яңартылган "Комсомолец" паркында булды, анда казанлылар белән кошлар өчен җимлекләр элде.