Казанда Бөек Җиңүнең 80 еллыгын бәйрәм итүгә әзерлек буенча оештыру комитеты төзелде

«Бөек Җиңү варислары» шәһәр фестивален уздыру планлаштырыла

Фото: Марат Мөгыйнов

(Казан шәһәре KZN.RU, 30 нчы ноябрь). Казанда 1941-1945 еллардагы Бөек Ватан сугышында Җиңүнең 80 еллыгын бәйрәм итүгә әзерлек буенча оештыру комитеты оештырылды. Аны шәһәр Башкарма комитеты җитәкчесе Рөстәм Гафаров җитәкләде. Тиешле карар Казан муниципаль берәмлегенең Документлар һәм хокукый актлар җыентыгында басылып чыкты.

Документ нигезендә 2024-2025 елларга бәйрәм чаралары исемлеге расланды. Аерым алганда, «Бөек Җиңү варислары» шәһәр фестивален, «Хәтер шәме», «Хәтер вахтасы», «Ветераннар йорты янында парад», «Үлемсез полк» акцияләрен, ТР ветераннары арасында «Балкыш» үзешчән башкаручылар фестиваленең шәһәр этабын һәм башка чараларны уздыру планлаштырыла. Ел саен веноклар һәм чәчәкләр салу, мәдәни-массакүләм һәм спорт чаралары, салютлар, хәйрия акцияләре һәм түгәрәк өстәлләр, ветераннарны һәм тыл хезмәтчәннәрен өйләренә барып котлау, открыткалар җибәрү, социаль реклама каралган.

Җиңүнең 80 еллыгын бәйрәм итүгә багышланган планда шулай ук сугыш ветераннарына медицина ярдәме күрсәтү дә бар: ел саен диспансерлаштыру, сәламәтлек күрсәткечләре буенча чираттан тыш госпитализацияләү, сәламәтлек саклау учреждениеләрендә бушлай дәвалау һәм тикшерү. Ялгыз ветераннарга кирәкле социаль ярдәм күрсәтеләчәк, мәсәлән, аларга торакны ремонтлауда ярдәм итәчәкләр, бәйрәм чараларына барганда транспорт хезмәте күрсәтәчәкләр.

Җиңү көне алдыннан шәһәр территорияләрен, аерым алганда, сугыш геройлары хөрмәтенә аталган урамнарны төзекләндерү эшләре алып барылачак. Җиңү паркында хәрби техниканы, су асты рубкасын, колоннадаларны, һәйкәлләрне, Мәңгелек утны, кечкенә архитектура формаларын ремонтлау һәм буяу, чәчәк үсентеләрен утырту планлаштырыла. Шулай ук шәһәрдә мемориаль такталар һәм обелисклар, һәйкәлләр, туганнар һәм шәхси каберлекләр тәртипкә китереләчәк.

2024-2025 елларга социаль учреждениеләрдә музейларны, музей бүлмәләрен, экспонатларны, хәрби һәм хезмәт даны почмакларын яңарту планлаштырылган, мәктәп лагерьлары һәм музейлар янында казанлыларның хәрби һәм хезмәт батырлыклары турында материалларны өйрәнү һәм җыю өчен эзләү отрядлары төзеләчәк.

Бәйрәм чараларын әзерләүгә һәм уздыруга тиешле шәһәр хезмәтләренең 2024 һәм 2025 елларга чыгымнар сметасында каралган акчалар, шулай ук спонсорлык ярдәме, башка бюджеттан тыш чыганаклардан һәм әлеге максатларга ТР бюджетыннан кергән акчалар юнәлтеләчәк.

Шулай ук укыгыз

Барлык яңалыклар