Казанда Гагарин һәм Короленко урамнары киселешендә булган юл-транспорт һәлакәте шаһитларын эзлиләр

Җәяүлеләр кичүендә җәяүлене билгесез машина бәрдерә.

(Казан шәһәре KZN.RU, 14-нче август). Казанның Дәүләт автоинспекциясе кичә, 13 августта, Гагарин һәм Короленко урамнары киселешендә көйләнә торган җәяүлеләр кичүендә булган юл-транспорт һәлакәте шаһитларын эзли.

2.00 сәгатьтә билгесез автомобиль, светофорның кызыл уты януга карамастан, туктап тормыйча, 31 яшьлек җәяүлене бәрдерә. Зыян күрүченең уң як бот сөяге җәрәхәтләнә, ә машина йөртүче һәлакәт урыныннан кача. Әлеге вакыйга шаһитларын 843) 533-38-19 һәм 533-38-48 телефоннары буенча мөрәҗәгать итәргә чакыралар.

Узган тәүлек эчендә Казанда барлыгы 157 юл-транспорт һәлакәте теркәлгән, аларның 10-сында зыян күрүчеләр бар. Юл йөрү кагыйдәләрен бозган өчен 581 машина йөртүче һәм 53 җәяүле административ җаваплылыкка тартылган, дип хәбәр итә ЮХИДИ пропаганда төркеме.

Шулай ук укыгыз

Барлык яңалыклар