Казанда очучы Александр Крупновның туганнарын эзлиләр

Агымдагы елның июль аенда Таман култыгы су астында фашистлар бәрдергән ЛАГГ-3 Совет истребителе табылуы турында хәбәр ителде.

(Казан шәһәре KZN.RU, 14-нче август). Татарстанда 1943 елның 25-нче февралендә Таман култыгы районында хәбәрсез югалган очучы Александр Леонидович Крупновның туганнары эзләнә. Бу хакта «Берега Керченского пролива» дип аталган Бөек Ватан сугышында һәлак булган сугышчыларның истәлеген мәңгеләштерү хәйрия фондының эзләүчеләре мөрәҗәгать иткән.

Фондта агымдагы елның июль аенда Таман култыгы су астында фашистлар бәрдергән ЛАГГ-3 Совет истребителе табылуы турында хәбәр иттеләр. Эзтабарлар табылган самолетны Казанда туып-үскән, 979-нчы Истребительләр полкының гвардия лейтенанты булган Александр Леонидович Крупнов йөрткән дип ышана. 1918 елда туган очучы Крупнов А.Л. самолеты бәрдерелә һәм, шаһитлар сүзләренчә, Таман култыгына егылып төшә.

Очкыч Таман култыгы төбендә - пилот кабинасы аска таба карап ята, пилот мәете әлегә табылмаган. Якын арада ЛАГГ-3 самолетын Таман култыгы төбеннән чыгарып, очучының җәсәден алу планлаштырыла, алар соңыннан Татарстанга күмү өчен тапшырылачак.

Судан чыгарылган самолет яңадан торгызылачак һәм Краснодар краеның Темрек районы территориясендә һәлак булган очучылар истәлегенә куелачак.

Очучы Александр Леонидович Крупновның туганнарыннан 8-962-448-30-30 телефон номеры буенча җавап бирүләрен сорыйлар.

Шулай ук укыгыз

Барлык яңалыклар