Казанда «Игелекле дулкын» фестиваленең финал сайлап алу этаплары узачак

Фестиваль 2-нче декабрьдә «Академия» концертлар залында узачак гала-концерт белән тәмамланачак.

(Казан шәһәре KZN.RU, 14-нче ноябрь). 29-нчы һәм 30-нчы ноябрьдә Казанда «Игелекле дулкын-2019» бөтенроссия балалар иҗаты мәдәни-хәйрия фестиваленең финал этаплары узачак. «Мәскәү» мәдәният үзәгендә төбәк этапларын уңышлы узган яшь талантлар чыгыш ясаячак.

Төбәк турлары Россиянең 11 шәһәрендә узды: Казан, Ярославль, Севастополь, Ростов-на-Дону, Владивосток, Новосибирск, Курск, Екатеринбург, Санкт-Петербург, Калининград һәм Мәскәү шәһәрләре. Казанда Идел буеның 150-дән артык яшь кешесе дүрт номинациядә иҗади номерлар тәкъдим итте: «Музыка», «Хореография», «Инструментта уйнау», «Сәхнә сәнгате».

Фестивальнең төбәк этапларында барлыгы меңгә якын бала катнашты.

2-нче декабрьдә «Академия» концертлар залында узачак гала-концертта иң яхшы номерлар тәкъдим ителәчәк һәм җиңүчеләрнең исемнәре аталачак. Сәхнәгә балалар белән Россия эстрадасы йолдызлары чыгачак. Узган ел «Игелекле дулкын»га популяр башкаручылар Филипп Киркоров, Валерия, Сергей Лазарев, Юлианна Караулова һәм Динә Гарипова килгән иде.

Исегезгә төшерәбез, «Игелекле дулкын» Бөтенроссия балалар иҗаты мәдәни-хәйрия фестивале 2017 елда Казан Мэры Илсур Метшин һәм Россиянең халык артисты, композитор Игорь Крутой инициативасы белән оештырылды. Фестиваль РФ Президенты грантлары фонды, ТР Хөкүмәте, Игорь Крутойның Популяр музыка академиясе, «Игелекле Казан» хәйриячелекне үстерүгә ярдәм фонды ярдәме белән уза.

Шулай ук укыгыз

Барлык яңалыклар