Казанда Минск көннәре узачак

Казанда Минск көннәре узачак

<p> Дүшәмбе һәм сишәмбе – 9 һәм 10 июньдә Татарстан башкаласында Минск көннәре узачак. Ике көн дәвамында бизнес-очрашулар, ярминкәләр, спорт һәм мәдәни чаралар уздыру планлаштырыла. Казан Ратушасында «Минск һәм Казан: кардәшлек – үсешнең яңа драйверы» икътисади бизнес-форумы үзәк вакыйга булачак. Анда Казан мэры Илсур Метшин һәм Минск шәһәре Башкарма комитеты рәисе Владимир Кухарев катнашыр дип көтелә. </p> <p> Казанга Минск шәһәре Башкарма комитеты рәисе Владимир Кухарев киләчәк. Аны эшмәкәрләр, шәһәр хакимияте вәкилләре, мәдәният һәм спорт эшлеклеләре делегациясе озатып йөриячәк. </p> <p> Дүшәмбе көнне шәһәр Ратушасында «Минск һәм Казан: кардәшлек – үсешнең яңа драйверы» бизнес-форумы узачак, аның кысаларында Белоруссия компанияләре вәкилләре белән сөйләшүләр узачак. Белоруссия республикасының рәсми делегациясе составында инновацион технологияләр, машина төзелеше, электр техникасы, авыл хуҗалыгы һәм азык-төлек продукциясе җитештерү, туризм һәм башка тармакларда эшләүче 20 дән артык предприятие вәкилләре көтелә. </p> <p> Программада шулай ук Белоруссия делегациясенең «Химград» технополисында, Бәшир Рәмиев исемендәге IТ-паркта һәм республиканың башка предприятиеләрендә булуы каралган. </p> <p> «Трудовые резервы» стадионында ике шәһәрнең спорт мәктәпләре укучылары арасында футбол матчы узачак. </p> <p> Минск көннәре мәдәни программасына «Сәйдәш» мәдәни үзәгендә узачак «Мінск вітае сяброў» концерт программасы һәм «Возрожденный из руин» фотокүргәзмәсе керә. </p> <p> Моннан тыш, 10 июньнән 15 июньгә кадәр «Казан» агросәнәгать паркы территориясендә җитештерүче предприятиеләрдән Белоруссия товарлары ярминкәсе эшләячәк. </p> <p> Татарстан башкаласында Минск көннәре Татарстан Республикасы белән Белоруссия Республикасы арасында сәүдә-икътисади элемтәләрне ныгыту максатында үткәрелә. </p> <p> Исегезгә төшерәбез, узган елның декабрендә Казан мэры Илсур Метшин һәм Минск Башкарма комитеты рәисе Владимир Кухарев шәһәрләр арасында кардәшлек мөнәсәбәтләре урнаштыру һәм хезмәттәшлек турында килешүгә <a target="_blank" href="https://kzn.ru/meriya/press-tsentr/novosti/kazan-i-minsk-stali-gorodami-pobratimami/?lang=ta">кул куйдылар</a>. Тантана Белоруссия башкаласы Ратушасында узды, анда Илсур Метшин эш визиты белән булды. </p> <p>   </p>

2025-06-03T11:59:00+0300