Кыш көне Казанда кар җыюда 560 тан артык махсус техника эшлиячәк

Бүгенгә аларның 75%ы урамнарны сезонлы карап тотуга әзерләгәннәр

Казанда бүген юл хезмәтләренең кышкы эш режимы башланды. Бу сезонда аларга 23 млн кв.м мәйданлы территорияне кардан чистартырга туры киләчәк, шуларның 4 млн кв.м тротуарларга туры килә. Моның өчен 562 махсус техника берәмлеге эшкә җигелә – аларның 75%ы кышкы режимга әзер. Көчле кар яуганда «Буран» планы буенча кар җыюга 1000 машина җәлеп итә алачак.

Эшкә 495 машина йөртүче-механизатор һәм 887 юл эшчесе кушылган. Шәһәр оешмалары актив рәвештә белгечләр җыюны дәвам итә.

Шәһәрдә дүрт подряд оешмасы билгеләнгән: «Шәһәр төзекләндерү» МУП (Авиатөзелеш һәм Яңа Савин районнары), «Шәһәр күперләре» МУП (Совет районы), «ДРЭУ» МУП (Киров һәм Мәскәү районнары), «Горводзеленхоз» тресты МУП (Вахитов һәм Идел буе районнары). Алар ел ахырына кадәр килешү йөкләмәләренә ия. Хәзер оешмаларның диспетчерлык хезмәтләре тәүлек буе эшли, шулай ук техниканың кизү торуы да оештырылган.

Урамнарны бозлавыктан эшкәртү өчен планлаштырылган 64 мең тоннадан 54 мең тонна ком-тоз катнашмасы әзерләнгән. Бөтен күләм октябрь ахырына кадәр әзер булачак. Реагентларга килгәндә, оешмалар 6,8 мең тонна сатып алган, якын арада алар 3,2 мең тонна, ә декабрьдә тагын 4,2 мең тонна сатып алачак. Мәрмәр валчыклы тротуар реагенты 590 тонна күләмендә сатып алынган. Барлык материаллар да куркынычсыз, бу дәүләт экология экспертизасы нәтиҗәсе белән раслана.

Карны 14 камера белән җиһазланган «Водоканал» МУП сигез кар эретү пунктына чыгарачаклар. Алар тәүлеккә 8 мең тонна кар кабул итә алачак. Шулай ук кар склады өчен Тэцевская урамы буенча 12 мең кв.м мәйданлы территория каралган. Өстәмә рәвештә районнарда вакытлы складлар өчен урыннар оештырыла, кишәрлекләрнең исемлеген ТР Экология һәм табигый байлыклар министрлыгына җибәрәчәкләр.

Кышкы эш режимы 182 көн дәвам итәчәк һәм 15 апрельдә тәмамланачак. Беренче чиратта карны җәмәгать транспорты маршрутлары, заезд тукталышы кесәләре, тротуарлар һәм җәяүлеләр кичүләре булган үзәк магистральләрдән чыгарачаклар. Аннары беренче һәм икенче категория юллары җыештырылачак. Карны тулысынча чыгару вакыты икедән җиде көнгә кадәр үзгәрә.

Исегезгә төшерәбез, узган кышта Казан урамнарыннан 2 млн 100 мең тоннадан артык кар чыгарылган һәм утильләштерелгән, бу шәһәр өчен абсолют рекорд булды. Өч кышкы айда 180 мм явым-төшем булган – бу еллык уртача нормадан 35%ка югарырак. ТР башкаласы Россиядә иң карлы икенче шәһәр булды.

Шулай ук укыгыз

Барлык яңалыклар