Казанда Россиядәге иң озын трамвай маршруты барлыкка киләчәк

Аны Зур Казан боҗрасы төзелешенең беренче этабы барышында салачаклар.

(Казан шәһәре KZN.RU, 25-нче май, Ксения Швецова). Казанда Зур Казан боҗрасын төзү эшләре дәвам итә. Мидхәт Булатов урамыннан Борисково урамына кадәрге участокта быел эшләрне төгәлләү һәм трамвай маршрутын боҗралау планлаштырыла. Боҗралы трамвай маршрутының гомуми озынлыгы 34 чакрым тәшкил итәчәк - бу Россиядәге иң озын трамвай маршруты булачак. Бу хакта бүген коронавирус инфекциясе таралуга каршы тору штабында Башкарма комитет җитәкчесе урынбасары - Тышкы төзекләндерү комитеты рәисе Игорь Куляжев хәбәр итте.

Узган ел Мидхәт Булатов урамыннан Техника урамына кадәр шәһәр өчен әһәмиятле булган участокта Зур Казан боҗрасын төзү эшләре башланды. И.Куляжев сүзләренә караганда, бүген биредә бик күп санда инженерлык коммуникацияләрен чыгару, яңа челтәрләр, яңгыр канализациясе урнаштыру, электр энергиясе белән тәэмин итү, тышкы яктырту эшләре башкарыла, юлүткәргеч һәм халыкның аз хәрәкәтләнүче төркемнәре өчен лифтлар белән җир өсте җәяүлеләр кичүе төзелә.

«Ахыр чиктә бу юл Идел һәм Кабан күлләре арасындагы сәнәгать зонасын торак өлеше белән тоташтырачак һәм 2 чакрым чамасы озынлыктагы кыска юл булачак, - дип билгеләде спикер. - Бу юл шәһәрнең үзәк өлешендә магистральләрне бушатачак». Төзелеш башланыр алдыннан юл төзелешенә эләгә торган корылмалы җир кишәрлекләрен сатып алуга бәйле мәсьәләне хәл итү буенча зур күләмле эшләр башкарылды, дип өстәде ул.

Мидхәт Булатов урамыннан Борисково урамына кадәрге участокта быел эшләрне төгәлләү һәм трамвай линиясен салу планлаштырыла. Исегезгә төшерәбез, монда трамвай хәрәкәтен ачу җәй ахырына планлаштырыла.

«Боҗралы трамвай маршрутының гомуми озынлыгы 34 чакрым тәшкил итәчәк, - дип хәбәр итте И.Куляжев. - Бу Россиядә иң озын трамвай маршруты булачак, ул шәһәрнең алты районы территориясе буенча узачак, анда яшәүчеләрнең күп кенә объектларга транспорт белән барып җитү проблемасын хәл итәчәк».

Исегезгә төшерәбез, Зур Казан боҗрасының беренче этабында 2019 елның июлендә Мидхәт Булатов урамыннан Борисково урамына кадәр төзелеш башланып китте, анда Ферма шоссесы өстеннән юлүткәргеч һәм җир асты кичүе белән 800 м озынлыктагы дүрт полосалы юл төзелә. Борисково урамыннан Техника урамына кадәрге участокта төзелешнең икенче этабы мартта башланды. Участокның озынлыгы 1,22 чакрым тәшкил итә. Дүрт полосалы юл һәр юнәлештә ике полоса белән беренче класслы гомумшәһәр әһәмиятендәге магистраль урам категориясе буенча проектланган. 700 м озынлыктагы участокны 2020 елда, ә 522 м озынлыктагы участокны 2021 елда кулланылышка кертү планлаштырыла.