Казанда Камилә Вәлиева адресына теләктәшлек белдерү сүзләре белән реклама щитлары барлыкка килде

Фигуристка бер көн элек Пекиндагы Олимпия уеннарында хатын-кызлар арасында ялгыз шуу буенча кыска программада җиңү яулады.

Фото: Марат Мөгыйнов

(Казан шәһәре KZN.RU, 16 нчы февраль). Казанда фигуристка Камилә Вәлиеваның фотосы һәм аның адресына теләктәшлек белдерү сүзләре белән электрон өслекле реклама щитлары барлыкка килде. Плакатларга «Камилә, без синең белән!» дип язылган. Барлыгы шәһәрдә шундый 29 реклама щиты урнаштырылган, шул исәптән Краснококшайск, М.Вахитов, Зур Крыловка, Чистай, Фучик, Зәкиев, Мәүлетов, Гвардия, Зорге урамнарында, Оренбург трактында, Ямашев һәм Җиңү проспектларында, дип хәбәр итә Казан Башкарма комитетының Тышкы реклама һәм мәгълүмат идарәсе.

Кичә чыгышы белән Казаннан булган 15 яшьлек Камилә Вәлиева Пекиндагы кышкы Олимпия уеннарында хатын-кызлар арасында ялгыз шуу буенча кыска программада җиңү яулады. Ә инде иртәгә, 17 нче февральдә, Олимпиадада хатын-кызлар арасындагы фигуралы шуу буенча турнирда медальләр уйнатылачак.

Исегезгә төшерәбез, кышкы Олимпия уеннары Пекинда 4 нче февральдән 20 нче февральгә кадәр уза. Россия җыелма командасының тулы исемлегенә 212 спортчы керде, шул исәптән 8 Татарстан спортчысы, барлыгы 103 хатын-кыз һәм 109 ир-ат. Иң зур заявка хоккейчыларда иде: ир-атлар командасында – 25, хатын-кызларда – 23 уенчы, дип хәбәр итә Россия Олимпия комитеты матбугат хезмәте.

Шулай ук укыгыз

Барлык яңалыклар